98
Ezabbuli.
1 Mwembere Musengwa olwembo olunyaaha olwohuba aholire ebyamaliholiho.
Aŋanguye nʼobuŋangi nʼamaani agʼomuhono gugwe omwawufu.
2 Musengwa alagire obunoŋosi wuwe,
gahwehulira amawanga ebiruŋamu ebi ahola.
3 Ahebuliiye ohwenda huhwe ohubitiirifu
nʼohuba mwesigwa eyiri Abayisirayiri,
abaatu hu hyalo hyosihyosi babona
obunoŋosi wa Hatonda weefe.
4 Abaatu mwesimwesi hu hyalo hyosihyosi,
mwembere Musengwa nʼesangaalo ni muhayaanira ŋamugulu,
mutumbuhe nʼohwemba nʼohusaŋalya.
5 Mwembere Musengwa nʼahatongooli,
nʼejanjaasi eryʼohwemba.
6 Mufuuŋe egwala nʼejanjaasi yʼolwiga lwʼemiigu,
muhayaane nʼesangaalo mu moni ja Musengwa habaha.
7 Leha enyanja nʼebiyirimo byosibyosi bimwembere.
Leha ehyalo nʼebiitu byosibyosi byembe.
8 Leha enjabi jihubbe mu ngalo,
leha esozi jihoohere ŋalala nʼesangaalo,
9 leha jembere mu moni ja Musengwa,
olwohuba alihuuja ohusalira abaatu hu hyalo emisango.
Aja husalira ehyalo emisango mu buluŋamu,
aliramula abaatu nʼatehubbira.