7
እስጢፋኖሳ ኦሄ
1 ካህኑንꬅ Ꮉላቅዘ እስጢፋኖሳጎ፥ «Ꮉና ቱሮ?» ያጋእ ኦጭዳ።
2 እስጢፋኖሳ፥ «ታ እሹንꬆን፥ ታ አዱንꬆ፥ ስኦተ! ኑ አዳይ አብራሃማ ካራነ የሳደስ Ꮉማዳንፓ ቲኖ ማሰጰጦምያ የሳደራ፥ ቦንቾ ጾዘ ኤስ ቆንጪ፥
3 ‹ነ ጋድትፓን ነ እግኑንꬃፓ ሻክንት ታ ነና ቤዘ ሳአ ቅቶ› ያጋይዳ።
4 የ ዎደ አብራሃማ ካልዳዉያነ ጋደፓ ኬዚ ካራነ ሳአ የዝዳ። ኤ አዳይ Ꮉይቂዳንፓ ሱባ ጾዚ ኤዛ Ꮉና ሳእተ Ꮉተ ይን የዛነ ክእዳ።
5 ኤ Ꮉና ጋድትፓ መለ አቶ የዝን ቶሄር የꬍዘ በስን አብራሃማስ እንግካያ። የዝን ናአ ኤስ ባይዘ ዎደ ጾዚ Ꮉና ሳእተ ኤስን ኤ ኮችትስ ላቶደ በሲ ማህ እንጎዳኖ ቃላ ገልዳ።
6 ጾዚ አብራሃማጎ፥ ‹ነ ኮችታ መለ ሳአ ዛቆትꬃ የሳዳ፤ እዘ ኦይዲ ጼት በረ ኡን አሮ ማቂ አቆደ ፋናን ኡንእንቶደ ፋና ኦህዳ።
7 የዝን ታ ነ ኮችቶ አህዘ ዎርዡንꬃላ ፍርዶዳ። ይንፓ ማቂ፥ ኡን ይና ጋድትፓ ከዚ Ꮉነ ታስ ጎይኖዳ› ጋይዳ።
8 ጾዚ አብራሃማ ኮችታ ጋራዝንቶደ ጋር ኤራ ጫቅን፥ ይሳቃ የልንትደ ኦስፉንꬆ ቃምተ ጋራዝንትዳ። ይሳቃ ያይቆባ የልዳ፤ ማህ ያይቆባ ታጶ ላምእ ፋ ናኡንꬃና፥ ዛርቲ አደ ማቅዱንꬃና ጋራዝዳ።
9 «ያይቆባ ናኡንꬅ ዮሰፋ እጺ ግብጸ ጋደ አሮተꬅስ ባይዝዳ፥ የዝን ጾዘ ኤራ የነ።
10 ኤዛ፥ ኤ ማꬍት ኡባፓ ከስዳ። ግብጸ ካት ፋሮና ቲኖ ሳባን ጭንጫትꬅን ኤስ እንግዳ። ግብጸ ካት ዮሰፋስ ግብጸ ሳአን ፋ ኬꬅቶ ኡባ አሆደ ፋና አደትꬅ ዎልቃ እንግዳ።
11 «ግብጸን ካናነ ሳአ ኡባ ናየ ገሊ ጋማ አስ ዋይꬅዳ። የ ዎደ ኑ አዳይ ያይቆባ ናኡንꬅ ካꬃ ደንጎደስ ዳንዳእካያ።
12 ያይቆባ ግብጸ ሳአ ካꬃ የዛኖ ስእ ኑ አዱንꬃና ቲኖ የይጋ ዳክዳ።
13 ላምእንꬃ Ꮉንግተ ዮሰፋ ፋ እሹንꬅስ ፋና ኤርስዳ። ግብጸ ካትዘን ዮሰፋ ኮችቶ ኤርዳ።
14 ዮሰፋ ፋ አዳይ ያይቆባራን ፋ ካራ አሱንꬃና፥ ላፑን ታም እችን አሱንꬃና ፋጎ የኦደ ጋር ዳኪ ክእዝዳ።
15 ያይቆባ ግብጸ ሳአ ዎꬍዳ፤ ኤዝን ኤ ናኡንꬅ እዘ Ꮉይቂዳ።
16 ኡን አህታ ይና በስትፓ ሴኬመ ቶክንት Ꮉንግ፥ እዘ አብራሃማ ኤሞረ ናኡንꬃፓ ጋማ ብራራ ዎንግደ ቦዝተ ሞግንትዳ።
17 «የዝን ጾዚ አብራሃማስ እማዳ ጋይዳኖ ፎልዘ ዎድታ የሎደስ ኡክደ ዎደ ግብጸ ሳአ የዘ ኑ አሱንꬅ ጋንግ ጋንግ Ꮉንግዳ።
18 ይንፓ ሱባ፥ ዮሰፋ ኤሮሰ መለ ካት ግብጸ ሳአ ካእትዳ።
19 የ ካትዘ ኑ ኮችቶ ገኒ ኤራꬅ ናኡንꬅ Ꮉይቆደ ፋናን ኡንታና ባለ ኬሲ ኦሎደ ፋና ኑ አዱንꬃና ኡንእꬅዳ።
20 «ይና ዎድተ ሙሴ የልንትዳ፤ ኤ ጾዘ ቲኖ ጋማ ሎኦ ብሻር የዘ ናአ። ፋ አዳይ ኬꬃ Ꮉይꬕ አግና የሎደስ ድጭዳ።
21 ሙሴ ካንግ Ꮉꬅ ጋጻ ጋድደ ዎደ ግብጸ ካት ናታ ደንግ ኤኪ ፋስ ናአ ማህ ኤዛ ድችዳ።
22 ሙሴ ግብጹንꬅ ኤራትꬅ ኡባ ታማሪ ኦሄራን ኦቻራን ምንꬂ አስ ማቅዳ።
23 «ሙሴስ ላይꬅታ ኦይታም ኩምደ ዎደ ፋ እሹንꬃና፥ እስራኤሉንꬃና በአደስ ፋ ዎዝንተ ቆፕዳ።
24 እስራኤሉንꬃፓ ፈታ ግብጸ አꬄ ቆሆደራ ብእ የ እስራኤለ አꬃ ማዲ፥ የ ቆህዛ ግብጸ አꬃ ዎꬊ ኩሸ ማህዳ።
25 ሙሴ ፋ እሹንꬃና ፋ ባጋራ ጾዚ አሾደስ ዪዛኖ ኡን ቲሮዳ ጋይዳ፥ የዝን ኡን ቲሪካያ።
26 «ዎንትስት ዎደ ላምእ እስራኤለ አሱንꬅ ፈተ ፈተራ Ꮉꬍንቶደራ ደንግ ኡንታና ጊግሳደስ ኮይ፥ ‹አሱንꬆ፥ ይን ዎልስ እሸ፤ አኮስ ፈተ ፈታ ቆሄ?› ያጋይዳ።
27 «የዝን ፋ ላግዛ ቆህዘ ሙሴጎ፥ ‹ነና ኑላ አህዘ አስን ዳይና ማህደ ኦደ?
28 ነ ኦማ ግብጸ አꬃ ዎꬍዳንጋራ ታና ዎꬎደስ ኮያነ?› ያጋእ ሙሴ ኡርቂ ዳክዳ።
29 ሙሴ ይኖ ስእደ ዎደ ግብጸፓ በቲ ሚድያመ ሳአ በተ አስ ማቂ የዝተራ ላምእ ꬊራꬅ ናኡንꬃና የልዳ።
30 «ላꬄ ኪታንቾ ኦይታም በረፓ ሱባ ሲና ደረ ካለ የዘ አኮ ባይዘ ጋናሳ ዥልኦ ኩበ ግዳ ኤጽዘ ታማ ሎጸ ግዳ ሙሴስ በንትዳ።
31 ሙሴ ፋ ብእዳነ ጋማ ቆፒ፥ ሎይꬂ በአደስ ዥልኦ ኩበ ካለ ሺቂ የዝን፥ ላꬄ ቃላ፥
32 ‹ታኒ ነ አዱንꬅ፥ አብራሃማ ጾዝ፥ ይሳቃ ጾዝ፥ ያይቆባ ጾዝ› ያጋእተራ ሙሴጎ ይእዳ። ሙሴ ዣሽሞራ ጎቂ በአደስ ዳንዳእካያ።
33 «ላꬂ ሙሴጎ፥ ‹ኔኒ ኤቅደ ሳእታ ጌሽ ማቅደ ግሾ ነ ቶህተ የዘ ጫምቶ ኬሶ።
34 ታኒ ግብጸ የዘ ታ አሱንꬅ ማꬋራን ፍርዳራ ኡንእንትዛኖ ብእዳ። ኡን ኡፍቶ ስእ ኡንታና አሾደስ ዎꬍዳ። Ꮉተ Ꮉይጋ! ታ ነና ግብጸ ኪቶዳ› ያጋይዳ።
35 «እስራኤሉንꬅ Ꮉያ ሙሴ፥ ‹ነና ኑላ Ꮉላቃን ዳይና ማህደ ኦደ?› ያጋእ እጽዳኖ Ꮉይ አꬃ ዥልኦ ኩበ ግዳ ኤስ በንትደ ኪታንቹንꬅ ባጋራ Ꮉላቃን አሽዛ ማህ ጾዚ ኪትዳ።
36 Ꮉይ አꬄ ሙሴ እስራኤሉንꬃና ግብጸፓ ኬሲ ጋማ ቆፍዘ ባዝን ክለ ባዝ ኦቺ ኡንታና ግብጸ ሳአ፥ ኤርተራ አባን፥ አኮ ባይዘ ጋናሳ ኦይታም በረ ካልꬅዳ።
37 «Ꮉይ አꬄ እስራኤለ አሱንꬃጎ፥ ‹ጾዚ ታና ደንꬅዳን ፋና ይን ኮችቲ ግዳፓ ታ ጋር ናበ ይንትስ ደንꬆዳ› ጋይዳይ ኤዛ ሙሴ።
38 አኮ ባይዘ ጋናሳ ሺቅደ እስራኤለ አሱንꬃራ የዝዳይ፥ ኑ አዱንꬃራ የዝዳይ ሲና ደርዘላ ኤስ ኦህደ ኪታንቹንꬃራ የዝደ ሙሴ ኤዛ። የይዝ፥ ጾዘ ደኦ ቃላ ኑስ እንጎደስ ኤክዳ።
39 «የዝን ኑ ማይዙንꬅ ሙሴስ ኪትንቶደስ ካꬍካያ፤ ኤዛ እጺ ሱብ ግብጸ ማቃደስ አሙꬍዳ።
40 ማህ አሮናን፥ ‹ኑና ካልꬅዘ ኤቁንꬃና ኑስ መꬎ። አኮስ ጋይኮ፥ Ꮉይኒ ኑና ግብጸፓ ክእደ ሙሴ፥ ዋየዛኮ ኑኒ ኤሮስ› ያጋይዳ።
41 የ ዎደ Ꮉርና አዝዝ ኤቁንꬃና መꬍዳ። የንꬅ ኤቁንꬅስ ዣርሾ ዣርሺ ፋ ኩሽተ ኦችደ ኦችታ ኡን ቆፍት ፋና Ꮉንደ ግሾ ኡፋይትዳ።
42 የዝን ጾዚ ኡንትስ ባንተ ማህዳ። ኡን ሳሎ ጾልንቶ ጎይኖደ ጋር ኡንታና ኦሊ አሽዳ። ናቡንꬅ ማጻፍተ፥
« ‹እስራኤለ አሱንꬆ፥ ኦይታም በረ ኡባ
አኮ ባይዘ ጋናስ ሳአ ሹክደ Ꮉርስን
ዣርሽደ ዣርሽቶ ታስ ሺሽዳነ?
43 ይን፥ ይንትስ ጎይኖደስ ኬስደ ሞሎኬ ዱንካነ
ረፋነ ጋእንትዘ ይን ኤቅዘ ጾልንቶ ምስለ ቱክዳ።
ታ ይንታና ባብሎነፓ
ጎደ ዳኮዳ› ጋእንት ጻፍንትዳ።
44 «ኑ አዱንꬅስ አኮ ባይዘ ጋናሳ ማርካ ዱንካነ የነ። ኤዛን ጾዚ ሙሴ ኪትዳንጋራን ኤዛ ቤዝዳንጋራን መꬍዳ።
45 ማህ ኑ አዱንꬅ ይና ዱንካንቶ ፋ አዱንꬃፓ ኤኪ ጾዚ ቲኖ ባይእደ አይሁደ ማቆሰ አሱንꬅ ጋድቶ አይክደ ዎደ እያሱራ የይጋ ኤኪ ገልዳ። የ ዱንካንዛ ዳዉተ ዎደ የሎደስ ይና በስተ የዝዳ።
46 ዳዉተ ጾዛፓ ናሽንትዳ። ማህ ያይቆባ ጾዘስ የሳደ ኬꬂ ኬጻደስ ጾዝ ዎስዳ።
47 የዝን ኤስ ኬꬂ ኬጽደ ሶሎሞና።
48 «ማቅኮን፥ ኡባፓ ካታራ የዘ ጾዘ አስ ኬጽደ ኬꬃ የዞስ። ናብዘ ጋይዳን ጋር፥
49 « ‹ሳሎ ታስ አራታ፥
ሳአን ታ ቶህታ የꬍዘ በሲ።
ዬዝን፥ ታስ ይን አኮ ጋርዘ ኬꬂ ኬጾደ?
ዎይ ታ ሸምፕዘ በስታ አባ?
50 Ꮉኖ ኡባ ታ ኩሽተ መꬍካ?› ያጋይዳ ላꬂ።
51 «ይን ዋይደ ስኦሰ አሶ? ይን ዎዝንታ ጾዘ ቃላ ኤኮደስ አኮስ እጽዶ? ይን Ꮉይታ አኮስ ቱልዶ? ይን፥ ይን አዱንꬅ ጋር ኡባ ዎደ ጌሽ አያና እጻነ።
52 ናቡንꬅ ግዳፓ ይን አዱንꬅ ባይእካይዘ ኦደ? ጽልዛይ ዮኦዳኖ ቲንꬊ ኦህዱንꬃና ዎꬍዳ። Ꮉተ ይን ኤዛ አꬂ እንግ ዎꬍዳ።
53 ይን ኪታንቾ ኩሸፓ ጾዘ ህግቶ ኤክዳ፥ የዝን ኪትንትካያ» ያጋይዳ።
እስጢፋኖሳ ሹቻራ ꬎግንተ
54 ኡን ይኖ ስእደ ዎደ ፋ ዎዝንተ እስጢፋኖሳላ ጋማ ዥልꬊ፥ ፋ ዶንቶ ꬋእ ማንድዳ።
55 የዝን እስጢፋኖሳ ጌሽ አያናራ ኩሚ፥ ሳሎ ኡደ ብእ፥ ጾዘ ቦንችቶን የሱሳ ጾዘ ምዛቅ ዛላራ ኤቅዳኖ ብእዳ።
56 «ይኬ፥ ታኒ ሳሎ ቡጉንትን፥ አስ ናአይ፥ ጾዘ ምዛቅ ዛላራ ኤቅዳያ ብእዳ» ያጋይዳ።
57 ፋ ቃልቶ ꬎቅ ዪዚ ዉይስተራ፥ ፋ Ꮉይቶ አይኪ ፈትላ ኤጎ ዎጽዳ
58 ኤዛ ካታማፓ ጋጻ ኬሲ፥ ሹቻራ ꬎግዳ። ማርኩንꬅ ፋ ማእቶ ፈቲ ሳዉላ ጋዘ ናአትꬅ አꬄ ካለ ጋድዳ።
59 እስጢፋኖሳ፥ «ታ ላꬆ የሱሳ፥ ታ ሸምፕቶ ኤኮ» ያጋእ ጼጎደራ ኡን ኤዛ ሹቻራ ꬎጋነ።
60 ቡንቁንቲ፥ ፋ ቃልቶ ꬎቅ ዪዚ፥ «ታ ላꬃዮ፥ Ꮉና ናጋርቶ ኡንትስ አቶ ጋኦ» ያጋይዳ። ይኖ ያጋእ ማቂ Ꮉይቂዳ።