47
Na God Dey Rule Di World
David Song Wey Korah Shidren Sing
1 Evribody! Make una kom!
Make una klap una hand!
Make una shaut praiz God with klean mind!
2 Bikos di Most High dey good!
Na-im bi di great King for di whole eart.
3 E distroy di pipol wey dey before us
kon put awa enemies under awa leg.
4 E choose and give us di Promise Land as awa propaty for life;
di place wey dey make Jakob shidren-shidren happy;
di shidren wey God love.
5 God dey waka go en throne
and pipol dey shaut and blow trumpet as E dey go.
6 So, make una sing praiz God; make una praiz am;
make una sing praiz to awa King, make una sing praiz am!
7 Na God bi di King for all di eart.
Make una praiz am with psalms!
8 Na God dey rule all di nashons,
even as E sidan for en holy throne.
9 Di rulers for di world gada togeda with Abraham and God pipol,
but bikos na God bi di King of evry king,
make una honor am for evriwhere for di world.