141
1 أَزهّذْ ن ذَاوُوذْ.
أَ سِيذِي، نشّْ تّْڒَاغِيغْ غَاركْ،
ذغْيَاثْ غَارِي،
سڒْ غَارْ ثْمِيجَّا إِنُو
خْمِي د خَاكْ إِ غَا تّْڒَاغِيغْ.
2 إِڒِي أَذْ ثْبدّْ ثْژَادْجِيثْ إِنُو
أَمْ ڒبْخُورْ إِتّْفُوحنْ زَّاثْ إِ وُوذمْ نّشْ،
ؤُڒَا ذ أَسْڭعّذْ ن إِفَاسّنْ إِنُو
أَمْ ثوْهِيبْثْ ن ثْمذِّيثْ.
3 أَ سِيذِي، أڭّْ إِجّْ ن ؤُعسَّاسْ
غَارْ ؤُقمُّومْ إِنُو،
حْضَا ثَاوَّارْثْ ن إِينْشِيشنْ إِنُو.
4 أڭّْ أَقَا ؤُڒْ إِنُو وَارْ إِتّْنجْبِيذْ
غَارْ إِشْثْ ن ثْمسْڒَاشْثْ ذ ثَاعفَّانْثْ،
مَاحنْذْ أَذْ ڭّغْ ثِيمڭَّا س ڒْْغشّْ
أَكْ-ذ إِرْيَازنْ نِّي إِتّڭّنْ ڒْْمُوعْصِييّثْ،
أڭّْ أَقَا نشّْ وَارْ تّتّغْ
زِي ثَازْيُوضِي نْسنْ.
5 أجّْ أَمْسڭّذْ أَذْ أَيِي إِوّثْ،
مَاغَارْ أَيَا ذ ثَامخْسِيوْثْ إِشوَّارنْ،
مَاڒَا نتَّا إِتّْسڭّذْ أَيِي،
أَيَا ذ زّشْثْ خْ ؤُزدْجِيفْ إِنُو،
أَذْ ت إِقْبڒْ ؤُزدْجِيفْ إِنُو.
وَاهْ، ؤُڒَا أَمُّو أَذْ ثِيڒِي ثْژَادْجِيثْ إِنُو عَاذْ
ضِيدّْ إِ ثْمڭَّا نْسنْ إِعفّْننْ.
6 ڒْْقُوضَاثْ نْسنْ مّنْضَارنْ سْوَادَّايْ
خْ ؤُغزْذِيسْ ن جَّارْفْ،
أَقَا سْڒِينْ بلِّي أَوَاڒنْ إِنُو ضَارْفنْ.
7 أَخْمِي ثتّْوَاشَارْزْ
ؤُ ثنُّورْزمْ ثمُّورْثْ،
أَمُّو إِ تّْوَازدْجْعنْ إِغْسَانْ نّغْ
غَارْ ؤُقمُّومْ ن ڒَْاخَارْثْ.
8 مَاشَا ثِيطَّاوِينْ إِنُو
خزَّارنْثْ-إِ-د غَاركْ،
أَ سِيذِي، سِيذِي إِنُو،
نشّْ أَركّْوَاڒغْ غَاركْ،
وَارْ تّجِّي ڒعْمَارْ إِنُو يَارْخفْ.
9 سِيڭّْوجْ أَيِي إِ ومْنَاعْ ن ڒْْفخْ
إِ ذ أَيِي مذْينْ،
زِي ثخْشِيفِينْ ن يِينِّي إِتّڭّنْ ڒْْمُوعْصِييّثْ.
10 إِڒِي إِعفَّاننْ أَذْ وْضَانْ مَارَّا
ذِي ثْرَاشَّاوِينْ نْسنْ،
مِينْ غَا كّغْعدُّوغْ.