16
Lamatualain nasaborin nenemboriꞌ raefafoꞌ nema
Basa ma, au rena haraꞌ mahereꞌ sa kalua mia Ume Hule-oꞌeꞌ, parenda ate kahituꞌ ra nae, “Mii leo! Oꞌo mendi bokor naa ra fo mbori Lamatualain nasaborin raefafoꞌ neu.”
Rena taꞌo naa, ma ate kaesan mbori bokor na isin raefafoꞌ nema. Aiboiꞌ ma, calaka dai basa atahori mana simbo rita banda deꞌulakaꞌ a dedꞌedꞌen, ma atahori mana songgo paton a. Basa se dai bisu manamburuꞌ nambetan seli.
Ate karuan mbori bokor na isin tasi neu. Aiboiꞌ ma, tasi oeꞌ a dadꞌi raaꞌ manamburuꞌ onaꞌ atahori mates raan. De mate hendi basa mana masodꞌa sia tasiꞌ a.
Basa naa ma, ate katelun mbori bokor na isin nisiꞌ loe no oe-mataꞌ ra. Boe ma basa oe ra dadꞌi raaꞌ. Boe ma au rena ate esa mia sorga mana parenda basa oe-mataꞌ ra sia raefafoꞌ. Ana koa-kio Lamatualain oi,
“O Lamatuaꞌ!
Lamatualain meumareꞌ!
Lamatualain nda ma salaꞌ sa!
Lamatualain sia eniꞌ a fefeun,
Boe ma sia losa doo nduꞌu-dꞌoon.
Lamatualain naꞌetuꞌ dedꞌeat no ndoo-tetuꞌ.
Lamatualain naꞌondaꞌ huku-dokiꞌ tungga ndoon.
Atahori rasaiꞌ
Lamatualain atahori nara raa nara.
Atahori tao risa
Lamatualain mana ola-ola nara ena.
Naa de, Lamatualain naꞌasusuuꞌ se fo ara o rinu raaꞌ boe.
Naa de, Lamatualain bala-bꞌae se no huku-doki matetuꞌ.”
Basa naa ma, au rena haraꞌ sa mia mei tutunu-hohotuꞌ a, nataa nae,
“Tebꞌe! Lamatualain mana koasa.
Tebꞌe! Lamatualain manaseliꞌ.
Lamatualain mana naꞌetuꞌ dedꞌeat no matetuꞌ.
Lamatualain mana naꞌondaꞌ huku-dokiꞌ tungga ndoon.
Basa ma, ate kahaan mbori bokor na isin nisiꞌ relo a. Aiboiꞌ ma, relo a natobꞌi nala seli, losa atahori ra rou nara elao. Basa atahori rou mana elaoꞌ ra, ndondon Lamatualain naran, huu Ana mana denu haitua calaka neu se. Mae onaꞌ naa o, nda hambu atahori esa doaꞌ sa boe, fo baliꞌ risiꞌ Lamatualain, ma koa-kio E.
10 Basa ma ate kaliman mbori bokor na isin neu banda deꞌulakaꞌ a kadera parendan. Aiboiꞌ ma, hatu-kikibuꞌ tatana nala basa atahori mana songgo e, losa ara henggu nisi nara, fo bisa raꞌatataaꞌ doidꞌosoꞌ a. 11 Ara o ndondon Lamatualain sia sorga, huu bisu nara rambeta seli. Mae onaꞌ naa o, nda hambu atahori esa naloeꞌ tao deꞌulakaꞌ sa, fo baliꞌ nisiꞌ Lamatualain.
12 Boe ma ate kaneen mbori bokor na isin nisiꞌ loe monaeꞌ sa, naran Efrat. Ma loe a madꞌa neuꞌ ena. De ara tao dalaꞌ sia naa fee neu maneꞌ ra ro soldꞌadꞌu mana rae rema mia seriꞌ rulu. 13 Boe ma ita nitu deꞌulakaꞌ telu. Mata-ao nara onaꞌ nggedꞌe e. Esa dea nema mia mengge-buta a bafan. Esa dea nema mia banda deꞌulaka nenetatiꞌ a bafan. Ma esa fai dea nema mia banda mana pepeko-lelekoꞌ a bafan. 14 Nitu kateluꞌ naa ra raꞌena koasa fo tao manadadꞌiꞌ mataꞌ-mataꞌ. Ara dea rema randa ro basa maneꞌ sia raefafoꞌ, ma kokoe se fo reu ratati labꞌan Lamatualain mana koasa manaseliꞌ a. Te faiꞌ fo ara rae reu ratati labꞌan Lamatualain naa, naeni Lamatualain fain fo naꞌetuꞌ nala nae nasenggiꞌ basa musu nara.
15-16 Mamanaꞌ fo ara maheluꞌ rae raꞌabꞌue siaꞌ a fo reu ratati, dedꞌea Ibrani oi, Armagedon.
Yesus Kristus o olaꞌ nae, “Misinedꞌa malolole! Aiboiꞌ neu ena, Au uma onaꞌ naꞌo fo atahori nda bubꞌuluꞌ sa. Atahori mana beꞌe no nanea no bua-baꞌu manadaiꞌ ara onton. Huu leleꞌ Au uma, ana nda hambu mae sa, huu atahori nda rita maꞌaholan sa.”
17 Basa de, ate kahitun mbori bokor na isin nisiꞌ anin. Ma Lamatualain olaꞌ nahereꞌ mia kadera parendan mia Ume Hule-oꞌeꞌ a nae, “Basa ena! Basa nasa Ngga nenemboriꞌ ena!”
18 Boe ma lalai a hadok neu-nema ma ndelas ndukurulu naꞌatututeꞌ. Ma rae nanggenggo manaseliꞌ, fo nda feꞌe parna dadꞌi sia raefafoꞌ ia sa. 19 Leleꞌ naa, Lamatualain nda liliiꞌ kota Babel deꞌulakan sa. Ana tao rae a nanggenggo manaseliꞌ, losa Kota manaseliꞌ naa natafaꞌa neu telu. Ana tao taꞌo naa, fo atahori Babel medꞌa rita nasan. Kota-kota feaꞌ sia raefafoꞌ o raꞌaloli boe. 20 Leleꞌ naa pulu-pulu ra tena reu ena, ma lete-leteꞌ ra o mopo basa se boe. 21 Hambu udꞌan es fatu monaeꞌ tudꞌa mia lalai de tuni nala atahori. Es fatu naa ra bera nara, ruma losa kilo haa nulu.* Huu udꞌan es tao doidꞌoso se, naa de atahori ndondon Lamatualain.
16:2 Kalua mia Masir 9:10 16:4 Kalua mia Masir 7:17-21; Sosodꞌat Koa-kioꞌ ra 78:44 16:10 Kalua mia Masir 10:21 16:12 Yesaya 11:15 16:15-16 Mateos 24:43-44; Lukas 12:39-40; Rae-fafoꞌ Mata Feuꞌ 3:3; 2 Mane-maneꞌ ra 23:29; Sakarias 12:11 16:18 Rae-fafoꞌ Mata Feuꞌ 8:5; 11:13, 19 16:19 Yesaya 51:17 16:20 Rae-fafoꞌ Mata Feuꞌ 6:14 * 16:21 Alkitab dedꞌea Yunani suraꞌ oi, “Beran onaꞌ talenta esa”. Talenta esa beran, naeni kilo 34-40. 16:21 Kalua mia Masir 9:23; Rae-fafoꞌ Mata Feuꞌ 11:19