51
بَبِلْن رَحْنيِ
عَلَتَلَ شَ مَسٍنيِ
عَلَتَلَ بَرَ عَ مَسٍن،
«ﭑ تُرُننَادّ شّيمَ نّ بَبِلْن شِلِ مَ،
تُرُننَادّ نَشَن قِندِشِ عَ يَشُييٍ رَ.
عٍ قَمَ نّ عَ رَيٍنسٍندٍ قٌيٍ كُي،
عٍ عَ هَرِفٍ بِرِن بَ عَ يِ رَ،
عٍ تِ عَ كَنكٍ عَ يِرٍ بِرِن.
شَلِ وٌلِ شَ عَ كَنكٍ مَكَنتَسٍ تٌنفٌ.
عَ نَشَ كِنِكِنِ بَبِلْن سّفّتَلَيٍ مَ، عَ شَ عٍ سْنتْ.
كَلِدِكَ قَشَشِيٍ تٌمَ نّ عٍ شَ بْشِ مَ يِرٍ بِرِن،
عٍ رَبِرَشِ كِرَيٍ مَ، عٍ سْشْشِ عَ حَاشِ رَ.»
 
«مَنفّ عَلَتَلَ مُ عِسِرَيِلَ نُن يُدَيَ رَبٌلٌمَ،
هَلِ عٍ شَ يُنُبِيٍ تٌ بَرَ فبٌ عٍ مَ عٍ شْنيِ عِسِرَيِلَ سّنِيّنتْي يَ شْرِ.
وٌ شَ كٍلِ بَبِلْن بْشِ مَ.
كَنكَن شَ عَ يّتّ رَكِسِ،
بَرِ مَ عَلَتَلَ قَمَ نّ عَ فبٍ حْشْدٍ،
عَ عٍ سَرٍ رَفبِلٍن عٍ مَ.
سِنفٍ، عَلَتَلَ نَن نُ قِندِشِ سَابُي رَ بَبِلْن بّ،
دُنِحَ بِرِن شَ حَشَنكَتَ، عٍ شَ مَدَشُ عَلْ سِيسِلَيٍ.
كْنْ يَكْسِ عَ فبٍ مُ لُشِ عَ شَ بِرَ، عَ شُن شَ رَكَنَ.
وٌ شَ عَ كُنقَ بَ،
وٌ شَ كَتَ سٍرِ سْتْدٍ عَ بّ عَلَكٌ عَ شَ يَلَن.»
عِسِرَيِلَكَيٍ شَ مَسٍنيِ
«وٌن بَرَ كَتَ بَبِلْن رَيَلَندٍ،
كْنْ عَ مُ سْونّيَشِ.
وٌن شَ عَ لُ نَا، وٌن شَ سِفَ وٌن شْنيِ،
بَرِ مَ عَ شَ يُنُبِيٍ بَرَ فبٌ يّ.
10 عَلَتَلَ بَرَ وٌن نَكِسِ تِنشِنيِ رَ.
وٌن شَ وٌن مَرِفِ عَلَتَلَ شَ كَابَنَكٌي دّنتّفّ سِيٌن.
11 تَنبّيٍ يَءِلَن، شَلِ سَسٍ رَقٍ.
عَلَتَلَ بَرَ عَ نِيَ مٍدٍ مَنفّ بْحّ شَ تٍ،
عَ شَ بَبِلْن حَشَنكَتَ عَ مَرِفِ بّ.
عَلَتَلَ فبٍحْشْي نَن نَ كِ عَ شَ هْرْ مْبَنشِ شَ قٍ رَ.
12 وٌ شَ تْنشُمَ رَتٍ بَبِلْن شَ تّتّ شِلِ مَ،
وٌ شَ سْورِيٍ شَ وُيَ، عٍ شَ عٍ يّتّ يَءِلَن فٍرٍ شِلِ مَ.
عَلَتَلَ قَمَ نّ عَ سَفٌ رَبَدٍ،
عَ عَ شَ نَتّ رَكَمَلِ بَبِلْنكَيٍ شِلِ مَ.»
نَمِحْنمّ شَ مَسٍنيِ
13 وٌ تَن بَبِلْنكَ نَاقُلِ كَنيِ نَشٍيٍ سَبَتِشِ شُرٍ دّ رَ،
وٌ حْن وَشَتِ بَرَ عَ لِ.
14 مَنفّ عَلَتَلَ بَرَ عَ كَلِ عَ يّتّ شِلِ رَ،
«ﭑ قَمَ نّ سْورِيٍ رَ وٌ شِلِ مَ،
عٍ وُيَ عَلْ تُفُمِ فَلِ، عٍ قَ سْنشْي بٍلٍبٍلٍ رَتٍ.»
 
15 عَلَتَلَ دُنِحَ دَاشِ عَ سّنبّ نَن نَ،
عَ شَرٍ سَ عَ شَ لْننِ رَ،
عَ كٌورٍ عِتَلَ عَ شَ قٍ كٌلٌنيِ رَ.
16 عَ نَ فَلَنيِ رَبُلَ، تُنّ يٍ كٍلِمَ نّ كٌورٍ مَ،
نُشُي تٍ بْشِ شُن مَ.
عَ سٍيَمَكْنيِ رَ مِنِمَ تُنّ،
عَ قٌيٍ رَ مِنِ عَ كٍلِدٍ.
17 عَدَ مَدِ قِندِشِ شَشِلِتَرٍ نَن نَ نَشَن مُ قَهَامُي سْتْ،
شّيمَ شَبُي يَافِ سْتْمَ نّ عَ شَ كُيٍيٍ سَابُي رَ،
نَشٍيٍ قِندِشِ كُيٍ وُلٍ حّنفِتَرٍيٍ رَ.
18 سٍ قُقَقُ نَن نَ عٍ رَ، لْننِلَ يٌمَ نَشَن مَ.
عٍ قَمَ نّ حْندٍ عٍ شَ كِيتِ وَشَتِ.
19 عَننَبِ يَشُبَ مَرِفِ تَن مُ نَ كِ شّ،
بَرِ مَ دَالِ مَنفّ نَ عَ رَ نَشَن شِلِ عَلَتَلَ سّنبّمَ،
نَشَن عَ شَ حَمَ دَا عَ يّتّ بّ.
عَلَتَلَ شَ مَسٍنيِ عِسِرَيِلَ بّ
20 «عِ تَن قِندِشِ ﭑ مَ فٍرٍ سٌسٍ نَن نَ،
ﭑ سِيٍ رَيٍنسٍنمَ نَشَن نَ،
ﭑ مَنفّيَ شُن نَكَنَمَ نَشَن سَابُي رَ،
21 ﭑ سٌي نُن عَ رَفِمَ شَ قٍ دَنمَ نَشَن نَ،
ﭑ سْورِ رَفِسٍ كَنَمَ نَشَن سَابُي رَ،
22 ﭑ شّمّ نُن فِنّ سْنتْمَ نَشَن نَ،
ﭑ سّفّتَلَ نُن فِنّدِ مّدِ قَشَمَ نَشَن سَابُي رَ،
23 ﭑ شُرُ سٍيٍ نُن عَ دّ مَدٌنيِيٍ رَيٍنسٍنمَ نَشَن نَ،
ﭑ شّ سَيٍ نُن عٍ شَ نِنفٍ رَيٍنسٍنمَ نَشَن سَابُي رَ،
ﭑ مَنفّ نُن كُنتِفِيٍ رَيٍنسٍنمَ نَشَن نَ.
24 ﭑ سَرٍ رَفبِلٍنمَ نّ بَبِلْن بْشِ نُن بَبِلْنكَيٍ مَ،
عٍ شَ قٍ حَاشِيٍ شَ قٍ رَ عٍ نَشَن نَبَشِ سِيٌن نَ.
عَلَتَلَ شَ مَسٍنيِ نَن نَ كِ.
25 ﭑ تِشِ عِ كَنكٍ، عِ تَن مَنفّيَ شُنفبٍ نَشَن دُنِحَ شُن نَكَنَ.
عَلَتَلَ شَ مَسٍنيِ نَن نَ كِ.
ﭑ نَ ﭑ شْنيّ عِتَلَمَ نّ عِ شِلِ مَ،
ﭑ عِ رَدِن تٍنتٍنيِ رَ،
ﭑ عِ قِندِ فٍيَ رَ نَشَن كُي عِفٍلِ.
26 تِدٍ يٌ مُ لُمَ عِ مَ سْنْن، سٍسٍ مُ تِمَ عِ شْنيِ.
عِ مُ قِندِ مَ عَ رَ عَبَدَن.
عَلَتَلَ شَ مَسٍنيِ نَن نَ كِ.»
 
27 «وٌ شَ تْنشُمَ رَتٍ دُنِحَ مَ.
وٌ شَ فٍرٍ سَرَ شُي رَ مِنِ سِيٍ تَفِ.
وٌ شَ كٍلِ، فٍرٍ شَ تِ بَبِلْن شِلِ مَ.
مَنفّيَ بِرِن شَ قَ كٍلِقٍ عَرَرَتِ، مِنِ، نُن عَسِكٍنَسِ.
سْورِ مَنفّ شَ سُفَندِ وٌ يَ مَ،
وٌ شَ سٌي شَ وُيَ عَلْ تُفُمِ فَلِ.
28 سِيٍ شَ قَ فٍرٍ شِلِ مَ،
مٍدٍ شَ مَنفّيٍ نُن عَ شَ كُنتِفِيٍ،
عَ نُن عٍ يَمَرِ مَ حَمَنّ نَشٍيٍ مَ.
29 بَبِلْن بْشِ سّرّنمَ نّ تْورّ كُي،
بَرِ مَ عَلَتَلَ شَ نَتّيٍ مُ كَنَمَ.
نَ بْشِ قَمَ نّ شُن نَكَنَدٍ،
مِشِ يٌ مُ سَبَتِمَ مّننِ سْنْن.
30 بَبِلْن شَ سْورِيٍ مُ فٍرٍ تِمَ سْنْن،
عٍ لُمَ عٍ شَ يِرٍ كَنتَشِيٍ نَن كُي تُن.
عٍ سّنبّ بَرَ حْن، عٍ قَ لُشِ نّ عَلْ فِنّيٍ.
عٍ شَ بَنشِيٍ بِرِن فَنشِ، عٍ شَ تّتّ نَادّ كَنَشِ.
31 شّيرَيٍ لُ رَ نّ قَ رَ مَنفّ شْنيِ،
عٍ عَ قَلَ عَ بّ عَ يَشُييٍ بَرَ دّننَشّ سُشُ.
32 عٍ بَرَ شُرٍ عِفِرِدٍيٍ سُشُ،
عٍ بَرَ تّ سٌ شّيٍ رَ،
بَبِلْن سْورِيٍ بَرَ لُ فَاشُي كُي.
33 ﭑ تَن عِسِرَيِلَ مَرِفِ عَلَتَلَ شَ مَسٍنيِ نَن يَ،
بَبِلْن تَا لُشِ نّ عَلْ لٌنيِ سَنسِ شْرِ بٌرٌنمَ دّننَشّ.
عَ شَ شّ شَبَ تّمُي نَ قَقٍ.»
عِسِرَيِلَكَيٍ شَ مَسٍنيِ
34 «بَبِلْن مَنفّ نٍبُكَدَنسَرِ بَرَ وٌن تْورْ،
عَ بَرَ وٌن شَشِلِ عِقُ،
عَ بَرَ وٌن لُ عَلْ بّكِ عِفٍلِ.
عَ لُشِ نّ عَلْ سُبٍ مَفَاشُشِ نَشَن بَرَ وٌن دٌن،
نَشَن لُفَ وٌن نَ، عَ وٌن بْشُن.
35 عَ قٍ حَاشِ نَشَن نَبَشِ وٌن تَن سِيٌنكَيٍ رَ،
نَ شَ فبِلٍن بَبِلْن مَ.
عَ نِي نَشٍيٍ بَشِ دَرِ سَلَمُ،
نَ سَرٍ شَ فبِلٍن بَبِلْنكَيٍ مَ.»
عَلَتَلَ شَ مَسٍنيِ
36 نَ كُي عَلَتَلَ نَشّ،
«وٌ شَ عَ مَتٌ، ﭑ قَمَ نّ وٌ شُن مَقَلَدٍ،
ﭑ قَ وٌ فبٍ حْشْدٍ.
ﭑ بَبِلْن بَا شْرِ مَ نّ، ﭑ عَ شَ دُلٌنيِيٍ شَرَ مَ نّ.
37 بَبِلْن قِندِ مَ نّ يِرٍ كَنَشِ رَ وُلَءِ بَرٍيٍ لُمَ دّننَشّ.
مِشِيٍ مُ تِنمَ لُدٍ نَ يِرٍ مَفَاشُشِ.
38 عَ شَ حَمَ شَاحّشِ عَلْ يّتّيٍ،
عٍ عٍ شُي رَ مِنِمَ عَلْ يّتّ يْرّ،
39 كْنْ عٍ نَ كٍلِ، ﭑ عٍ قِندِ مَ سِيسِلَيٍ نَن نَ،
نَشٍيٍ يٍلٍمَ هَن، كْنْ عٍ نَ شِ، عٍ مُ شُنُمَ سْنْن.
عَلَتَلَ شَ مَسٍنيِ نَن نَ كِ.»
 
40 «ﭑ عٍ رَفٌرٌ مَ نّ عَلْ يّشّي نَشٍيٍ كْن نَشَبَمَ،
عَلْ يّشّي نُن سِ كٌنتٌنيِيٍ.
41 بَبِلْن شُنفبٍ، دُنِحَ بِرِن نَشَن مَتْشْمَ،
نَ بِرَشِ دِ؟
مُنسٍ عَ نِيَشِ عَ شَ قِندِ فبَلٌي رَ سِيٍ تَفِ؟
42 بَا قَمَ نّ عَ مَكٌتٌدٍ، مْرْنيِيٍ دِن عَ رَ.
43 عَ شَ تَايٍ بّحِنمَ نّ، عٍ قِندِ فبٍنفبٍرٍنيِ رَ،
مِشِ مُ سَبَتِمَ دّننَشّ.
هَلِ بِيَاسِلَيٍ مُ لُمَ نَا.
44 ﭑ عٍ شَ كُيٍ بٍلِ حَشَنكَتَمَ نّ،
ﭑ قَ عَ نِيَ عَ شَ مِشِيٍ بّحِن عَ نَشٍيٍ سْتْ.
مِشِيٍ مُ كٍلِمَ حَمَنّيٍ مَ قَقٍ عَ بَتُدٍ سْنْن.
بَبِلْن شَ تّتّ بِرَ مَ نّ كٍرٍنيِ رَ.»
 
45 «ﭑ مَ حَمَ، وٌ شَ كٍلِ نَا.
وٌ شَ وٌ فِ، بَرِ مَ عَلَتَلَ شَ شْنّ بُلَمَ مّننِ نّ.
46 لِمَنِيَ نَشَ بَ وٌ يِ رَ،
وٌ نَشَ فَاشُ وْيّنيِ رَ نَشٍيٍ قَمَ مّدٍ نَا.
وْيّنيِ لُمَ قَلَ رَ نّ سّنبّمَيٍ شَ قٍ رَ نُن فٍرٍ شَ قٍ رَ.
47 وَشَتِ قَمَ عَ لِدٍ ﭑ بَبِلْن شَ كُيٍيٍ حَشَنكَتَمَ تّمُي نَشّ.
عَ شَ بْشِ بِرِن لُمَ يَافِ كُي نَ تّمُي نّ،
عَ شَ مِشِيٍ قَ سْنتْدٍ.
48 نَ كُي كٌورٍ نُن بْشِ قَمَ نّ حّلّشِندٍ عَ شَ بِرّ شَ قٍ رَ،
عَ يَشُييٍ سَفٌ مَ، يَشُي نَشٍيٍ كٍلِشِ كْولَ مَ.
عَلَتَلَ شَ مَسٍنيِ نَن نَ كِ.»
نَمِحْنمّ شَ مَسٍنيِ
49 «بَبِلْن شَ بِرَ عِسِرَيِلَكَ مِشِ قَشَشِيٍ شَ قٍ رَ،
عَلْ مِشِ فبٍفبٍ قَشَشِ دُنِحَ مَ كِ نَشّ بَبِلْن بّلّشّ قْشِ رَ.
50 وٌ تَن نَشٍيٍ بَرَ وٌ يّتّ رَتَنفَ سَنتِدّفّمَ مَ،
وٌ نَشَ دُفُندِ، وٌ شَ سِفَ.
هَلِ وٌ نَ يِرٍ مَكُيٍ،
وٌ شَ رَتُ عَلَتَلَ مَ، وٌ حْشْ شَ سَ دَرِ سَلَمُ شْن.»
عِسِرَيِلَ شَ مَسٍنيِ
51 «وٌن بَرَ يَافِ سْتْ، وٌن بَرَ كٌنبِ،
وٌن مُ نْمَ وٌن شُن نَكٍلِدٍ سْنْن،
بَرِ مَ سِ فبّتّيٍ بَرَ سٌ يِرٍ سّنِيّنشِيٍ كُي عَلَتَلَ شَ هْرْ مْبَنشِ يِرٍ.»
عَلَتَلَ شَ مَسٍنيِ
52 عَلَتَلَ شَ مَسٍنيِ نَن يَ،
«ﭑ نَ فّ بَبِلْن شَ كُيٍيٍ حَشَنكَتَدٍ،
عَ شَ حَمَ لُمَ وَ رَ نّ بْشِ بِرِن مَ.
53 هَلِ بَبِلْن شَ قٍ قَمَ سْونّيَدٍ نُ،
عَ شَ شُننَكٍلِ سْتْ،
ﭑ قَمَ نّ عَ نِيَدٍ عَ شَ قٍ بِرِن شَ كَنَ.
عَلَتَلَ شَ مَسٍنيِ نَن نَ كِ.»
 
54 «شُي شْرْشْي مِنِمَ بَبِلْن بْشِ مَ عَ شَ كَنَرِ نَن شَ قٍ رَ.
55 عَلَتَلَ قَمَ نّ بَبِلْن شُن نَكَنَدٍ،
عَ عٍ شَ سْنشْي دَن.
عٍ يَشُييٍ دِنمَ نّ عٍ رَ عَلْ بَا مْرْنيِيٍ،
عٍ شُي شَاحّ عَ حَاشِ رَ.
56 كَنَرِتِيٍ بِرَ مَ نّ بَبِلْنكَيٍ قْشْ رَ،
عٍ عٍ شَ سْورِيٍ سُشُ، عٍ عٍ شَ شَلِيٍ عِفِرَ،
بَرِ مَ عَلَتَلَ فبٍحْشْي تِمَ نّ،
عَ عٍ سَرٍ بِرِن نَفبِلٍن عٍ مَ.
57 ﭑ عٍ شَ مَنفّيٍ، كُنتِفِيٍ، لْننِلَيٍ نُن سْورِيٍ قِندِ مَ سِيسِلَيٍ نَن نَ،
نَشٍيٍ لُمَ شِ رَ عَبَدَن، عٍ مُ شُنُمَ قٍقٍ مَ.
مَنفّ شَ مَسٍنيِ نَن نَ كِ،
نَشَن شِلِ عَلَتَلَ سّنبّمَ.»
 
58 «عَلَتَلَ شَ مَسٍنيِ نَن يَ،
بَبِلْن شَ تّتّ شُنفبٍ بِرَ مَ نّ،
عَ شَ نَادّ عِتٍشِيٍ فَن،
عَ شَ حَمَ عَ يّتّ رَتَفَن قٍ قُقَقُ مَ،
عَ وَلِ نَشَن نَبَشِ، نَ بِرِن فَن تّ رَ.»
59 عَننَبِ يٍرٍ مِ تٌ يُدَيَ مَنفّ سٍدٍكِيَ مَتِ بَبِلْن عَ شَ مَنفّيَ حّ نَانِ ندٍ رَ، عَ نَشَ يِ مَسٍنيِ سٌ نٍرِيَ شَ دِ سٍرَيَ يِ رَ، نَشَن قِندِشِ مَشَسٍيَ شَ مَمَدِ رَ. 60 عَ نُ بَرَ بَبِلْن شَ فبَلٌي شَ قٍ بِرِن سّبّ كّيدِ ندٍ مَ، عَ نُ لَنمَ عٍ شَ نَشٍيٍ سْتْ. 61 عَ نَشَ عَ قَلَ سٍرَيَ بّ، «عِ نَ بَبِلْن بْشِ لِ، عِ شَ يِ مَسٍنيِ بِرِن شَرَن عِ شُي عِتٍشِ رَ. 62 نَ تّمُي، عِ شَ عَ قَلَ، ‹عَلَتَلَ، عِ بَرَ عَ مَسٍن عَ يِ يِرٍ بِرِن قَمَ نّ كَنَدٍ، مِشِيٍ نُن شُرُ سٍ مُ تٌمَ بٍ سْنْن، يِ بْشِ قَ قِندِ فبٍنفبٍرٍنيِ رَ.› 63 عِ نَ فّ يِ سّبّلِ شَرَندٍ، عِ شَ عَ شِرِ فّمّ ندٍ رَ، عِ قَ نَ فّمّ وٌلِ عٍقِرَتِ شُرٍ شْورَ. 64 نَ تّمُي عِ شَ عَ قَلَ، ‹بَبِلْن قَن دُلَمَ نَ كِ نّ، عَ مُ تٍمَ سْنْن فبَلٌي شَ قٍ رَ عَلَتَلَ نَشَن نَفِرِشِ عَ مَ. عَ شَ حَمَ شُن مُ رَكٍلِمَ سْنْن.›»
عَننَبِ يٍرٍ مِ شَ مَسٍنيِ دَنشِ بٍ نّ.