22
سّرّشّبَدٍ يَءِلَنشِ يُرُدّن
1 نَ تّمُي يٌسُوٍ نَشَ رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ شِلِ.
2 عَ عَ قَلَ عٍ بّ، «عَلَتَلَ شَ كٌنيِ مُنسَ قٍ نَشَن بِرِن قَلَ وٌ بّ، وٌ بَرَ نَ بِرِن نَبَ. وٌ مَن بَرَ بِرَ ﭑ شُي بِرِن قْشْ رَ.
3 وٌ مُ وٌ نفَشَكٍرٍنيِيٍ رَبّحِن يِ شِ وُيَشِيٍ بُن مَ هَن تٌ. وٌ مَرِفِ عَلَتَلَ يَامَرِ نَشَن سٌ وٌ يِ رَ، وٌ بَرَ وٌ حّنفِ سَ عَ شْن مَ.
4 يَكْسِ وٌ مَرِفِ عَلَتَلَ بَرَ مَلَبُي قِ وٌ نفَشَكٍرٍنيِيٍ مَ، عَلْ عَ عَ مَسٍن عٍ بّ كِ نَشّ. يَكْسِ وٌ سِفَ وٌ شْنيِ. وٌ شَ فبِلٍن نَ بْشِ مَ عَلَتَلَ شَ كٌنيِ مُنسَ دّننَشّ سٌشِ وٌ يِ رَ يُرُدّن كِرِ مَ.
5 وٌ شَ مّينِ يِ سّرِيّ نُن يِ يَامَرِ رَبَقٍ مَ، عَلَتَلَ شَ كٌنيِ مُنسَ نَشَن سٌشِ وٌ يِ رَ. وٌ شَ وٌ مَرِفِ عَلَتَلَ شَنُ، وٌ شَ بِرَ عَ شَ كِرَ بِرِن قْشْ رَ، وٌ شَ وٌ حّنفِ سَ عَ شَ يَامَرِ شْن وٌ حَنِفٍ قِيشّ رَ نُن وٌ نِي بِرِن نَ.»
6 يٌسُوٍ نَشَ دُبَ عٍ بّ، عٍ قَ سِفَ عٍ شْنيِ.
7 عَننَبِ مُنسَ نُ بَرَ كّ سٌ مَنَسِ بْنسْي سّيتِ كٍرٍن يِ رَ بَسَن. يٌسُوٍ قَن نَشَ كّ سٌ يِ سّيتِ بٌورٍ يِ رَ عٍ نفَشَكٍرٍنيِيٍ قّ مَ يُرُدّن سٌفٍفٌرٌدٍ. يٌسُوٍ تٌ نُ عٍ رَ سِفَمَ عٍ شْنيِ، عَ نَشَ دُبَ عٍ بّ.
8 عَ نَشّ عٍ بّ، «وٌ نُن هَرِفٍ فبٍفبٍ شَ فبِلٍن وٌ شْنيِ، نُن شُرُ سٍيٍ، فبٍتِ، شّيمَ، يْشُي، وُرٍ، نُن دُفِيٍ. وٌ نُن وٌ نفَشَكٍرٍنيِيٍ شَ وٌ يَشُييٍ هَرِفٍ عِتَشُن وٌ وٌ وَ سَسٌشِ نَشٍيٍ.»
9 رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ نَشَ فبِلٍن. عٍ نَشَ كٍلِ عِسِرَيِلَكَيٍ شُن مَ سِلٌ، كَنَان بْشِ مَ، عٍ سِفَ فَلَدِ بْشِ مَ، بْشِ نَشَن قِندِ عٍ فبٍ رَ عَلَتَلَ شَ يَامَرِ بُن مَ عَننَبِ مُنسَ سَابُي رَ.
10 عٍ تٌ سٌ يُرُدّن نَبِلِنيِ كَنَان بْشِ مَ، رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ نَشَ سّرّشّبَدٍ بٍلٍبٍلٍ يَءِلَن يُرُدّن شُرٍ دّ رَ.
11 عِسِرَيِلَكَيٍ تٌ نَ مّ، عٍ نَشَ عَ قَلَ، «وٌ بَرَ عَ تٌ، رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ بَرَ سّرّشّبَدٍ يَءِلَن كَنَان بْشِ مَ، يُرُدّن تَايٍ كُي عِسِرَيِلَكَيٍ قّ مَ.»
12 عِسِرَيِلَكَيٍ تٌ نَ قٍ كٌلٌن، عٍ بِرِن نَشَ عٍ مَلَن سِلٌ عَلَكٌ عٍ شَ تٍ عٍ فٍرٍدٍ.
13 عِسِرَيِلَكَيٍ نَشَ قِنٍشَسِ، سّرّشّدُبّ عٍلٍيَسَرِ شَ دِ شّي فَلَدِ بْشِ مَ، رُبٍن بْنسْي، فَدِ بْنسْي نُن مَنَسِ بْنسْي سّيتِ سِنفٍ شْن.
14 مَنفّ قُ، بْنسْي يٌ بْنسْي مَنفّ كٍرٍن، نَشَ عَ مَتِ. نٍيٍ بِرِن نُ قِندِشِ عٍ شَبِلّ شُنيِيٍ نَن نَ عِسِرَيِلَكَيٍ وُلُ وُلُ تَفِ.
15 عٍ نَشَ سِفَ رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ يِرٍ، فَلَدِ بْشِ مَ. قِنٍشَسِ نَشَ عَ قَلَ عٍ بّ،
16 «عَلَتَلَ شَ حَمَ بِرِن يِ نَن مَسٍنشِ، ‹وٌ عِسِرَيِلَ مَرِفِ عَلَ يَنقَشِ مُنقٍ رَ؟ تٌ، وٌ فبِلٍنشِ عَلَتَلَ قْشْ رَ مُنقٍ رَ؟ وٌ سّرّشّبَدٍ يَءِلَنشِ مُنقٍ رَ، نَشَن قِندِشِ عَلَتَلَ مَتَندِقٍ رَ؟
17 وٌن قٍ حَاشِ نَشَن نَبَ ثٍيٌرِ، هَن تٌ وٌن نَ نَ تْورّ نَن كُي يِ كِ. هَلِ عَلَتَلَ تٌ حَشَنكَتّ دْشْ عَ شَ حَمَ بِرِن مَ نَ قٍ مَ، هَن تٌ وٌن مُ نُ سّنِيّن سِندٍن.
18 تٌ، وٌ بَرَ مُرُتَ وٌ مَرِفِ عَلَتَلَ مَ. شَ وٌ عَلَتَلَ مَتَندِ مَ تٌ، تِنَ عَ شَ شْنّ قَمَ نّ دُ سُدٍ عِسِرَيِلَ حَمَ نَن بِرِن شُن مَ.
19 نَ كُي، بْشِ نَشَن قِندِ وٌ فبٍ رَ، شَ نَ مُ سّنِيّنشِ، وٌ شَ فبِلٍن عَلَتَلَ شَ بْشِ مَ، عَلَكٌ وٌ شَ وٌ يّتّ بْشِ سْتْ مُشُ تَفِ. كْنْ وٌ نَشَ عَلَتَلَ نُن عِسِرَيِلَكَيٍ مَتَندِ سّرّشّبَدٍ يَءِلَنقٍ رَ دٍ، نَشَن مُ قِندِشِ وٌن مَرِفِ عَلَتَلَ شَ سّرّشّبَدٍ رَ.
20 سٍرَ شَ دِ عَكَن تٌ تِنشِنتَرٍيَ رَبَ سٍ رَتْنشِيٍ رَ، سٍيٍ رَ عَ مُ لَن نَشٍيٍ شَ تٌنفٌ، عَلَتَلَ نَشَ شْنْ عِسِرَيِلَكَيٍ بِرِن مَ. عَ كٍرٍن شَ مُ هَلَكِ عَ شَ يُنُبِ رَبَشِ مَ.›»
21 رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ نَشَ عِسِرَيِلَ مَنفّيٍ يَابِ،
22 «مَرِفِ عَلَتَلَ، عَ تَن نَن نَ مَنفّ عَلَ رَ! عَ تَن نَن عَ كٌلٌن مُشُ يِ رَبَشِ قٍ نَشَن مَ. عِسِرَيِلَكَ بِرِن قَن قَمَ عَ كٌلٌندٍ. شَ مُشُ بَرَ عَلَتَلَ مَتَندِ، شَ مُشُ بَرَ تِنشِنتَرٍيَ رَبَ، مُشُ نَشَ كِسِ تٌ لْشْي.
23 شَ مُشُ سّرّشّبَدٍ يَءِلَنشِ مُشُ يّتّ نَن بّ، عَلَكٌ مُشُ شَ فبِلٍن مُشُ مَرِفِ عَلَتَلَ قْشْ رَ، مُشُ شَ سّرّشّ فَن دَاشِ، سّرّشّ حَنِفٍشِ، نُن شَنُنتٍيَ سّرّشّ بَ، عَلَتَلَ يّتّ يَتِ نَن قَمَ مُشُ مَكِيتِدٍ.»
24 «كْنْ نَ مْولِ شَ مُ عَ رَ. مُشُ يِ رَبَشِ نّ بَرِ مَ مُشُ نُ بَرَ كْنتْقِلِ، تِنَ وٌ شَ دِيٍ نْمَ نّ عَ قَلَدٍ مُشُ شَ دِيٍ بّ، ‹دَرِ مُندُن نَ وٌ تَن نُن عِسِرَيِلَ مَرِفِ عَلَتَلَ تَفِ؟
25 عَلَتَلَ يُرُدّن نَن قِندِشِ وٌن نَانِنيِ رَ. رُبٍن بْنسْي نُن فَدِ بْنسْي، وٌ فبٍ يٌ مُ نَ عَلَتَلَ فبٍ يَ مَ.› مُشُ شَ دِيٍ بَمَ نّ فَاشُقٍ عَلَتَلَ يَ رَ وٌ شَ دِيٍ سَابُي رَ.»
26 «نَ كُي مُشُ نَشَ عَ قَلَ، وٌن قَن شَ سّرّشّبَدٍ يَءِلَن. سّرّشّ فَن دَاشِ نُن سّرّشّ مْولِ فبّتّ يٌ مُ بَمَ نَ،
27 كْنْ نَ شَ قِندِ سٍيدٍ رَ وٌ تَن نُن مُشُ تَن تَفِ، وٌ بْنسْي نُن مُشُ بْنسْي تَفِ هَلِ وٌن تَن دَنفِ شَنبِ، مُشُ عَلَتَلَ رَبَتُمَ سّرّشّ فَن دَاشِ، سّرّشّ حَنِفٍشِ، نُن شَنُنتٍيَ سّرّشّ رَ عَ شَ هْرْ مْلِنفِرَ يَ رَ. نَ تّمُي وٌ شَ دِيٍ نَشَ قَ سَ عَ قَلَ مُشُ شَ دِيٍ بّ، ‹وٌ فبٍ يٌ مُ نَ عَلَتَلَ فبٍ يَ مَ.›
28 مُشُ بَرَ عَ قَلَ، تِنَ، شَ عٍ سَ نَ وْيّنيِ قَلَ مُشُ بّ، شَ نَ مُ مُشُ شَ دِيٍ بّ، مُشُ قَن عٍ يَابِمَ نّ، ‹وٌ عَلَتَلَ شَ سّرّشّبَدٍ كّحَ مَتٌ، مُشُ بَبَيٍ نَشَن يَءِلَنشِ. سّرّشّ فَن دَاشِ نُن سّرّشّ مْولِ فبّتّ يٌ مُ بَمَ نَا، كْنْ نَ شَ قِندِ سٍيدٍ رَ وٌ تَن نُن مُشُ تَن تَفِ.›
29 عَلَ شَ مُشُ تَنفَ مُشُ بْحّ رَتٍقٍ رَ عَلَتَلَ شِلِ مَ. عَ شَ مُشُ تَنفَ مُشُ فبِلٍنقٍ رَ عَ قْشْ رَ تٌ لْشْي سّرّشّبَدٍ يَءِلَنقٍ رَ، سّرّشّ فَن دَاشِيٍ، سّرّشّ حَنِفٍشِيٍ، نُن شَنُنتٍيَ سّرّشّيٍ بَمَ دّننَشّ. نٍيٍ بَمَ وٌن مَرِفِ عَلَتَلَ شَ سّرّشّبَدٍ فبَنسَن نّ، نَشَن نَ وٌن مَرِفِ عَلَتَلَ شَ هْرْ مْلِنفِرَ يَ رَ.»
30 سّرّشّدُبّ قِنٍشَسِ، مَنفّدِيٍ نُن عِسِرَيِلَ وُلُ وُلُ مَنفّيٍ تٌ يِ مَسٍنيِ مّ، رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ نَشَن مَسٍنشِ، عٍ بْحّ نَشَ رَقَن عٍ مَ.
31 سّرّشّدُبّ عٍلٍيَسَرِ شَ دِ قِنٍشَسِ نَشَ عَ مَسٍن رُبٍن بْنسْي، فَدِ بْنسْي، نُن مَنَسِ بْنسْي سّيتِ سِنفٍ بّ، «مُشُ بَرَ عَ كٌلٌن عَلَتَلَ نَ وٌن يَ مَ تٌ لْشْي، بَرِ مَ وٌ مُ تِنشِنتَرٍيَ رَبَشِ عَلَتَلَ رَ. وٌ بَرَ عِسِرَيِلَكَيٍ رَتَنفَ عَلَتَلَ بّلّشّ عِ.»
32 سّرّشّدُبّ عٍلٍيَسَرِ شَ دِ قِنٍشَسِ نُن مَنفّيٍ نَشَ كٍلِ فَلَدِ بْشِ مَ، رُبٍن، نُن فَدِ بْنسْي نُ نَ دّننَشّ، عٍ فبِلٍن كَنَان بْشِ مَ عِسِرَيِلَكَيٍ يِرٍ، عٍ دّنتّفّ سَ عٍ بّ.
33 يِ دّنتّفّ نَشَ رَقَن عِسِرَيِلَكَيٍ مَ، عٍ نَشَ عَلَ تَنتُ. فٍرٍ سٌقٍ، عٍ شَ رُبٍن نُن فَدِ شَ بْشِ سْنتْ، نَ مَحْشُنيِ مُ لُ عٍ يِ سْنْن.
34 رُبٍن نُن فَدِ بْنسْي نَشَ يِ شِلِ سَ نَ سّرّشّبَدٍ شُن مَ؛ «عَ تَن نَن نَ وٌن تَفِ سٍيدٍ رَ عَ عَلَتَلَ نَن نَ عَلَ رَ.»