23
يٌسُوٍ شَ مَسٍنيِ دْنشْي
تّمُي فبٍفبٍ دَنفِ نّ كَقِ عَلَتَلَ نَشَ مَلَبُي قِ عِسِرَيِلَ حَمَ مَ، عَ رَتَنفَقٍ عَ يَشُييٍ مَ عَ رَبِلِنيِ. يٌسُوٍ نُ بَرَ قٌرِ، عَ شَ سِمَيَ نُ بَرَ بُ. نَ كُي يٌسُوٍ نَشَ عِسِرَيِلَ بِرِن مَلَن، عَ قٌرِيٍ، عَ مَنفّيٍ، عَ كِيتِسَيٍ، نُن عَ سْورِ مَنفّيٍ. عَ نَشَ عَ قَلَ عٍ بّ، «ﭑ بَرَ قٌرِ، ﭑ مَ سِمَيَ بَرَ عَ عِكُيَ. وٌ بَرَ عَ تٌ وٌ مَرِفِ عَلَتَلَ قٍ نَشَن بِرِن نَبَشِ يِ سِيٍ رَ وٌ شَ قٍ رَ. وٌ مَرِفِ عَلَتَلَ نَن فٍرٍ سٌشِ وٌ بّ.»
«وٌ عَ مَتٌ، ﭑ بَرَ كّ بْشِ سٌ وٌ يِ رَ، عَلَ نَشَن حَنِفٍشِ وٌ بْنسْييٍ بّ. نَ بْشِ بِرِن، سِيٍ فبّتّيٍ نُ دّننَشّ، نُن دّننَشّ سُشُ دَاشِ لُشِ، يُرُدّن نُن بَا شُنفبٍ لٌنفٌرِ سٌفٍفٌرٌدٍ، ﭑ بَرَ نَ بِرِن عِتَشُن وٌ مَ. وٌ مَرِفِ عَلَتَلَ عٍ مَكُيَمَ نّ وٌ رَ ثٌن، عَ عٍ قَشَ وٌ يَ رَ، وٌ قَ عٍ شَ بْشِ تٌنفٌ عَلْ وٌ مَرِفِ عَلَتَلَ عَ مَسٍن وٌ بّ كِ نَشّ.»
«وٌ وٌ سّنبّ سٌ. وٌ شَ وٌ مّينِ سّرِيّ بِرِن نَبَتُقٍ مَ نَشَن سّبّشِ تَوُرٍتَ مُنسَ كُي. وٌ نَشَ بِنيَ يِرٍقَنيِ مَ، وٌ نَشَ بِنيَ كْولَ مَ. وٌ نَشَ سُنبُ يِ سِيٍ رَ، نَشٍيٍ لُشِ وٌ يَ مَ. وٌ نَشَ عٍ شَ عَلَيٍ مَشَندِ، وٌ نَشَ وٌ كَلِ عٍ شِلِ رَ. وٌ نَشَ عٍ بَتُ، وٌ نَشَ وٌ تُوبِ عٍ بّ. كْنْ وٌ تَن شَ وٌ تَفِ عِشِرِ وٌ مَرِفِ عَلَتَلَ شَ قٍ رَ، عَلْ وٌ بَرَ قَ عَ رَبَ رَ كِ نَشّ هَن تٌ.»
«عَلَتَلَ بَرَ سِ فبَنفبَلَنيِ سّنبّمَيٍ هَلَكِ وٌ يَ رَ، كٍلِ نَ مَ، هَن تٌ، مِشِ كٍرٍن مُ نْشِ تِدٍ وٌ يَ رَ. 10 وٌ يَ مَ، مِشِ كٍرٍن نُ مِشِ وُلُ نَن كٍرِ مَ، بَرِ مَ وٌ مَرِفِ عَلَتَلَ نَن نُ فٍرٍ سٌمَ وٌ بّ عَلْ عَ عَ لَايِدِ وٌ بّ كِ نَشّ. 11 وٌ شَ وٌ حّنفِ سَ وٌ يّتّ كَن شْن مَ عَ قَنيِ رَ، وٌ شَ وٌ مَرِفِ عَلَتَلَ شَنُ.»
12 «كْنْ شَ وٌ وٌ كٌبٍ تِ وٌ مَرِفِ عَلَتَلَ رَ، وٌ نَشَ بِرَ سِ فبّتّيٍ قْشْ رَ نَشٍيٍ لُشِ وٌ يَ مَ، وٌ نَشَ سُنبُ عٍ رَ، وٌ نَشَ عٍ شَ دِ فِنّيٍ دْشْ، 13 وٌ شَ عَ كٌلٌن وٌ مَرِفِ عَلَتَلَ مُ قَمَ يِ سِيٍ رَفِدٍ وٌ يَ رَ سْنْن. عٍ قِندِ مَ وٌ بّ يّلّ نُن فَنتَنيِ نَن نَ، عٍ قِندِ لُشُسِنيِ رَ وٌ قَرِ، عٍ قِندِ تُنبٍ رَ وٌ يَ كُي، هَن وٌ بِرِن فّ هَلَكِدٍ يِ بْشِ قَنيِ مَ وٌ مَرِفِ عَلَتَلَ نَشَن قِشِ وٌ مَ.»
14 «عَ فبٍ مُ لُشِ ﭑ شَ قَشَ عَلْ نِمَسٍ بِرِن نَشٍيٍ نَ دُنِحَ بّندّ قُحِ قَرِ. وٌ شَ عَ كٌلٌن وٌ بْحّ كُي، وٌ نِي بِرِن نَ، وٌ مَرِفِ عَلَتَلَ لَايِدِ يٌ نَشَن تٌنفٌشِ وٌ بّ، نَ مُ كَنَمَ. عَ شَ لَايِدِ بِرِن بَرَ كَمَلِ، كٍرٍن مُ كَنَشِ. 15 وٌ شَ عَ كٌلٌن وٌ مَرِفِ عَلَتَلَ عَ شَ لَايِدِ قَنيِ رَكَمَلِشِ كِ نَشّ، عَ مَن قَمَ عَ شَ لَايِدِ حَشَنكَتّ دَاشِ رَكَمَلِدٍ نَ كِ نّ، هَن عَ فّ وٌ هَلَكِدٍ يِ بْشِ قَنيِ مَ عَ دّننَشّ قِشِ وٌ مَ. 16 شَ وٌ تٌندِ يِ سَاتّ رَكَمَلِدٍ وٌ مَرِفِ عَلَتَلَ وٌ يَمَرِشِ نَشَن نَ، شَ وٌ وٌ تُوبِ عَلَ فبّتّيٍ بّ، وٌ نَشَ وٌ قٍلٍن عٍ بّ، عَلَتَلَ شْنْمَ نّ وٌ مَ، وٌ قَ هَلَكِ، عَ وٌ رَلْي يِ بْشِ قَنيِ مَ، عَ دّننَشّ قِشِ وٌ مَ.»