ꠀꠟ-ꠎꠛꠥꠞ ১৩
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠅ ꠝꠣꠛꠥꠖ, ꠀꠞ ꠇꠔꠖꠤꠘ? ꠔꠥꠝꠤ ꠀꠝꠣꠞꠦ ꠌꠤꠞꠇꠣꠟꠃ ꠚꠣꠃꠞꠤꠀ ꠞꠁꠔꠣꠄ ꠘꠤ?
ꠔꠥꠝꠣꠞ ꠙꠛꠤꠔ꠆ꠞ ꠝꠥꠈ ꠈꠣꠘ ꠀꠞ ꠇꠔꠖꠤꠘ ꠀꠝꠣꠞ ꠉꠦꠍ ꠕꠣꠇꠤ ꠟꠥꠇꠣꠁ ꠞꠣꠈꠔꠣꠄ?
2 ꠀꠞ ꠇꠔꠖꠤꠘ ꠀꠝꠤ ꠝꠘꠞ ꠌꠤꠘ꠆ꠔꠣꠞ ꠜꠣꠞ,
ꠖꠤꠟꠞ ꠇꠡ꠆ꠐꠞ ꠛꠥꠏꠣ ꠙꠞꠔꠤꠖꠤꠘ ꠡꠁꠔꠣꠝ ꠘꠤ?
ꠀꠝꠣꠞ ꠖꠥꠡꠝꠘ ꠅꠇꠟ ꠇꠔꠖꠤꠘ ꠀꠝꠣꠞ ꠃꠙꠞꠦ ꠘꠣꠌꠤꠔ?
3 ꠅ ꠀꠟ꠆ꠟꠣ, ꠀꠝꠣꠞ ꠛꠣꠄꠖꠤ ꠌꠣꠅ, ꠝꠣꠛꠥꠖ ꠉ, ꠀꠝꠣꠞ ꠝꠤꠘꠔꠤꠞ ꠎꠥꠀꠙ ꠖꠦꠅ,
ꠀꠝꠣꠞ ꠌꠃꠈꠅ ꠛꠟ-ꠞꠥꠡꠘꠤ ꠖꠦꠅ, ꠀꠞꠘꠣꠄ ꠀꠝꠤ ꠢꠄꠔ ꠀꠈꠦꠞꠤ ꠊꠥꠝꠅ ꠙꠠꠤꠎꠤꠝꠥ।
4 ꠛꠣꠖꠦ ꠖꠥꠡꠝꠘꠦ ꠇꠁꠛꠣ, “ꠅꠈꠘ ꠔ ꠀꠝꠞꠣ ꠎꠤꠔꠤ ꠉꠦꠍꠤ,”
ꠀꠞ ꠀꠝꠤ ꠅꠡꠢꠣꠄ-ꠝꠣꠎꠥꠞ ꠛꠘꠤꠉꠦꠟꠦ ꠀꠝꠣꠞ ꠛꠤꠞꠥꠗꠤ ꠅꠇꠟꠦ ꠔ ꠚꠥꠞ꠆ꠔꠤ-ꠀꠝꠥꠖ ꠇꠞꠛꠣ।
5 ꠅꠁꠟꠦ ꠀꠝꠤ ꠜꠞꠡꠣ ꠇꠞꠤ ꠔꠥꠝꠣꠞ ꠖꠄꠀꠞ ꠃꠙꠞꠦꠃ,
ꠔꠥꠝꠤ ꠎꠣꠘ ꠛꠣꠌꠣꠁꠛꠣꠄ, ꠅꠔꠣꠞ ꠟꠣꠉꠤ ꠀꠝꠣꠞ ꠖꠤꠟ ꠈꠥꠡꠤꠄ ꠜꠞꠤꠉꠦꠍꠦ।
6 ꠀꠝꠤ ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠁꠝꠥ,
ꠀꠝꠣꠞ ꠜꠣꠟꠣꠁ ꠔ ꠔꠣꠁꠘꠃ ꠇꠞꠍꠂꠘ॥