5
La lamkai pan: theile toh tho a sah dinga David lasem.
1 O Pakai, ka taona ocheng ho nei ngaipeh in;
ka lungthim a kataona jong nei gelkhoh peh in.
2 Panpi ngaija ka kana nei gelkhohpeh in, ka lengpa le ka Pathen,
ajeh chu nangma kom'a bou taova kahi.
3 O Pakai, jingkah teng kataona nei ngaipeh in.
Jingkah seh leh nangma lam sang ingting ka ngaichat jouse nakom kahin lhut a kinemtah a ngah jing ding kahi.
4 Nangma thil phalou ho chunga kipah ji Pathen nahipon;
migilou ho jong na angsung'a aum theiji pouve.
5 Nangma angsung'a mikiletsah ho a ding jou jipon,
Pakai nangman gitlouna le chonset bol jouse nathet soh hel e.
6 Nangin jou thusei ho na suhmang ding ahi.
Pakaijin mijoulhep ho leh tolthat ho athet ahi.
7 Keima din vang, na ngailutna bulhingset jal chun na hongsung hunglut nange;
chule nangma Hou-In theng mai a bohkhup a chibai kaboh ding nahi.
8 O Pakai, ka melma ten eijo louna din,
na lamdih a neipui in.
Ka masanga um lampi hi ka juidihna din neihin lhunpeh in.
9 Ajeh chu kamelma te kamsunga thutah apotthei tapoi.
Asunglam'u jong setna jeng ahitai.
Alol sung ujong lhankhuh abangin.
Alei ujong chuche a kilhunglut kalbi abang e.
10 O Pathen, amaho khu gotna petan.
Aduhabol nau hi amaho lhuhna hihen.
Achonset nau ho jeh in delmang jengin,
ajeh chu amaho hin nangma dounan na atong'un ahi.
11 Ahin koi hileh nangma lhalim noi'a umho chu thanom uhen;
Nangma thangvahna la chu kipah tah in sajing uhen.
Amaho chunga nalha jah in hoidoh jingin lang,
Nangma min ngailu jing ho jong kipa nan lodim jing uhen.
12 O Pakai, nang'in michonpha ho phatthei naboh tei in;
Nalung tohte ngailutna ompho phatah achun na hoibit jing e.