6
David in Sheminith lakai a semjang jangget toh tho dia la lamkaipa sah dia asem.
1 O Pakai, nei lunghan san loujen in
Lungsatna moljol a chun nei khoukhah hih hel'in.
2 Nei khoto teijin lhasam le hatlou kahi, Pakai.
Nei damsah in kagu kachang jousen eichip ui.
3 Ka lhagao alengvai lheh jeng tai.
O Pakai, itih chanpi hitia hi kaum ding hitam?
4 Hung kilen, O Pakai, ka lhagao huhdoh in.
Na mingailutna longlou jeh chun neihin huhdoh tei in.
5 Ajeh chu thina ahin nangma geldohna aumpoi.
Lhankhuh a konna jong koi ham nahin thangvah ding?
6 Kaka kamao nan ka chaolha tai.
Janseh a kaka nan ka jalkhun achin'in,
ka kana mitlhi hon kalupna jalkhun akotsah sohtai.
7 Genthei a kaka nan kamit athim tan;
kagal miten eisuh genthei jeh uvin apomhel jengtai.
8 Gitlouna bol ho jouse kakom'a kon'in potdoh tauvin,
ajeh chu Pakaijin ka kana eijah peh tai.
9 Pakaijin ka ngaichat a kathumna ho eihetpeh tan;
ka taona hi eidonbut ding ahitai.
10 Kagal mite jouse kijumsou henlang kithing pumin um uhen.
Jum le ja pumin gangtah in kinungle tauhen.