7
Cush kiti Benjamin mipa chung chang a David in tumging jat chom-chom ho to thoa Pakai anga anasahdoh la
1 O Pakai, ka Pathen eihoidam din nangma kahin bel'e.
Eipedoh a pang hoa kon'in nei hoidoh sah in—nei huhdoh in!
2 Achuti loule, panpi ding bei a kaum a,
keipi bahkai jin mi aboset banga ahal halla eibotel diu ahi.
3 O Pakai ka Pathen, keiman thil suhkhel kaneija,
thil dihlou kana tohdoh khah a,
4 lungmonga kachen khompi khat chonphat louna ka lethuh a,
ajeh beija ka galmi kachom khah a ahileh,
5 kagal mite khut ah nei pedoh jengin.
Ama hon tolla eichotpha jeng uhen
chule ka loupina jouse bonlah a kaithang jeng uhen.
Selah
6 O Pakai, lunghang in hung thoudoh in!
Doumit melpu kagal mite jeh in nang hung kichoi sang'in!
Kipatdoh in, ka Pathen na thutan dihtah chu hinpolut in!
7 Na masangah chitin namtin kikhom soh hen.
Ama ho chunga namun dihtah chu hin kimusah kit in.
8 Pakai chun chitin namtin ho thu atan ahi.
Ka chondihna ho nei phondoh peh tan, O Pakai,
ajeh chu keiman themmona kanei poi, O Hatchungnung Pen!
9 Miphalou ho thil dihlou bolna kichai sah tan,
chule michonpha ho chu domsangin.
Ajeh chu nangman mihem lungthim gilsung ve,
Pathen dihtah chu nahi.
10 Pathen hi kalum'a pang ahin,
alungthim dih le akitah ho chu ahuhhing jin ahi.
11 Pathen hi thutan dihtah ahi.
Niseh in miphalou chunga alunghang jingin ahi.
12 Mihem khat chu akisih louva ahileh,
Pathen'in achemjam kinol hem intin;
athalpi kaosa akoijing ahi.
13 Aman thina manchah gimneitah chu kigot intin
athalpi meikou chu akap ding ahi.
14 Miphalou hon setna avop un;
umhelna le thil phalouva agaiun
jouthu ho ahin pendoh sah jiuve.
15 Ama hon mi lhahlutna dingin kotong thuhtah alai jiuvin,
ahinlah amaho joh alhalut jiuvin ahi.
16 Mi dia setna abol hou chu amaho angsung joh a achujin ahi.
Thilse agon hou chu amaho luchung joh a achujin ahi.
17 Keiman Pakai chu akitahna jeh in thangvah ing ting;
Keiman Pakai Hatchungnung Pen min chu ka thangvah ding ahi.