10
Orasaun husu justisa
1 NAI Maromak, tansaa mak Ita Boot hamriik dook nunee?
Tansaa mak Ita Boot subar Aan bainhira ami iha susar laran?
2 Ema aat sira foti aan hodi hanehan ema kbiit-laek sira;
husik sira monu ba lasu nebee mak sira rasik halo tiha ona.
3 Ema aat sira gaba aan kona ba saida mak sira nia laran kaan;
ema nebee matan naklosu ba sasaan hatete aat NAI Maromak hodi hatuun Nia naran.
4 Ema aat sira nee foti aan dehan Maromak sei la husu tuir sira;
iha sira nia neon tomak la iha fatin ba Maromak.
5 Sira nia moris diak hela deit;
sira la interese Maromak nia lei;
sira sempre hamoe sira nia inimigu.
6 Sira hatete ba sira nia aan, “La iha buat ida mak atu doko hau;
susar nunka atu kona hau.”
7 Sira nia ibun nakonu ho hotar, lia bosok ho ameasa;
sira kaan koalia liafuan nebee halo susar ema no halo aat ema.
8 Sira subar nonook besik aldeia;
husi sira nia subar fatin sira oho ema nebee la hatene buat ida.
Sira hafuhu ema nebee sira atu oho;
9 sira hein hanesan liaun nebee helik iha ai huun.
Sira hein atu kaer ema kbiit-laek;
sira kaer ema kbiit-laek sira nee ho lasu hodi dada sai.
10 Ho sira nia forsa sira hamonu tiha vitima sira nee
hodi sama hanehan ba rai.
11 Sira hatete ba sira nia aan, “Maromak sei la nota ida;
Nia taka tiha ona Nia matan, Nia la haree saida mak hau halo.”
12 NAI Maromak, hamriik ba! Maromak, foti Ita Boot nia liman hasoru sira;
keta haluha ema kbiit-laek sira.
13 Tansaa mak ema aat sira hatete aat Maromak?
Tansaa mak sira dehan ba sira nia aan, “Nia sei la kastigu hau”?
14 Maibee Ita Boot nia matan haree duni ema nebee iha terus ho susar laran;
Ita Boot nia liman sempre prontu hodi tulun sira.
Vitima sira nee oferese sira nia aan ba Ita Boot;
Ita Boot mak ajudador ba oan kiak sira.
15 Silu tohar tiha ema aat sira nia liman ba;
eziji sira para hataan hotu hahalok aat nebee sira halo tiha ona.
16 NAI Maromak nee Liurai tinan ba tinan;
nasaun jentiu sira sei lakon mohu husi Nia rain.
17 NAI, Ita Boot rona ema mukit sira nia hakarak;
Ita Boot hametin sira nia laran hodi see tilun ba sira nia halerik.
18 Ita Boot defende oan kiak sira ho vitima sira nebee ema hanehan,
atu nunee ema iha mundu la bele halo teror tan.