9
Kantiku hahii Nai Maromak tanba Nia justisa
Salmu David nian, ba dirijenti koru. Tuir muzika “Oan mane mate.”
1 NAI Maromak, hau sei agradese ba Ita Boot ho hau nia laran tomak;
hau sei hatete sai buat furak hotu nebee Ita Boot halo.
2 Hau sei kontenti ho haksolok tanba Ita Boot nia diak;
Maromak Aas Liu, hau sei hananu hahii Ita Boot nia naran.
3 Hau nia inimigu sira hakiduk tiha ona;
sira sidi monu, sira mate iha Ita Boot nia oin.
4 Tanba Ita Boot tuur iha kadeira ukun nudar Juis nebee loos,
Ita Boot defende hau hodi foo justisa lo-loos mai hau.
5 Ita Boot siak ona nasaun jentiu sira;
Ita Boot halo rahun ona ema aat sira;
Ita Boot halakon tiha ona sira nia naran too tinan ba tinan.
6 Hau nia inimigu sira mate mohu ona, sira hanesan uma nebee rahun tiha ona.
Ita Boot fokit sai tiha sira nia sidade hotu;
ema nunka atu hanoin tan sira tinan ba tinan.
7 Maibee NAI Maromak ukun tinan ba tinan;
Nia hametin tiha ona Nia kadeira ukun para tesi lia.
8 Nia ukun mundu ho justisa;
Nia tesi lia ba ema hotu ho lo-loos.
9 NAI nee abrigu ba ema kbiit-laek sira;
Nia sai sira nia abrigu iha tempu susar.
10 NAI, ema nebee konhese Ita Boot konfia Ita Boot,
tanba Ita Boot nunka husik ema nebee mak harohan ba Ita Boot.
11 Hananu hahii NAI Maromak ba, Nia ukun iha Siaun;
foo sai ba nasaun jentiu sira kona ba buat nebee Nia halo tiha ona.
12 Tanba Maromak buka tuir ema oho door;
Nia sempre hanoin ema kbiit-laek sira;
Nia la haluha sira nia halerik.
13 NAI Maromak, haree ba, hau nia inimigu sira hanehan hau!
Hanoin hau ba, hasees tiha hau husi odamatan mate nian,
14 atu hau bele baa tuur iha odamatan sidade Jerusalém nian
hodi konta sai Ita Boot nia diak
no haksolok tanba Ita Boot salva tiha ona hau.
15 Nasaun jentiu sira monu tiha ona ba rai kuak nebee sira rasik mak kee;
sira nia ain belit tiha ona iha lasu nebee sira rasik mak monta subar.
16 Bainhira NAI Maromak foo justisa, Nia hatudu sai Nia Aan;
ema aat sira nia hahalok rasik sai lasu hodi halo sira monu.
17 Ema aat sira tuun dadauk ba ema mate sira nia fatin;
nasaun hotu-hotu nebee mak haluha Maromak sei sai nunee.
18 Maibee Maromak sei la haluha ema kiak sira;
ema kbiit-laek sira nia esperansa sei la mohu.
19 NAI Maromak, hamriik ba! Keta husik ema kriatura mak manaan fali Ita Boot;
haruka nasaun jentiu sira hotu hataan iha Ita Boot nia oin.
20 NAI, hatauk sira ba;
nasaun sira nee tenki hatene katak sira ema kriatura deit.