8
Nai Maromak iha lalehan foti aas ema kriatura
Salmu David nian, tuir muzika Gitit. Ba dirijenti koru.
1 NAI Maromak, ami nia Nai,
Ita Boot nia naran furak teb-tebes iha mundu tomak!
Ita Boot nia naran aas liu lalehan;
2 labarik ho kiikoan sira nebee sei susu hela hahii Ita Boot.
Ita Boot hatuur tiha ona Ita nia kbiit hodi hasoru Ita Boot nia inimigu sira,
halo funu baluk sira ho ema nebee mak rai odi sai nonook tiha.
3 Hau hateke sae ba lalehan; lalehan nee Ita Boot nia liman fuan mak halo;
hau haree ba fulan ho fitun nebee mak Ita Boot hatuur tiha ona iha nia fatin.
4 Ami ema kriatura see loos, too Ita Boot interese ami?
Ami ema kbiit-laek nee see loos, too Ita Boot tau matan mai ami?
5 Ita Boot halo ami kiik liu uitoan anju sira;
Ita Boot foo fatin aas ba ami hodi foti aas ami nia naran.
6 Ita Boot foti ami ukun buat hotu-hotu nebee Ita Boot nia liman halo tiha ona;
Ita Boot halo buat hotu-hotu hakruuk mai ami:
7 bibi ho karau sira hotu,
ho mos animal fuik sira,
8 manu fuik iha lalehan,
ikan iha tasi laran
ho saida deit mak moris iha tasi laran.
9 NAI Maromak, ami nia Nai,
Ita Boot nia naran furak teb-tebes iha mundu tomak!