7
Orasaun husu justisa
Salmu nee David kanta ba NAI Maromak kona ba Kuxe, ema ida husi suku Benjamim.
1 NAI, hau nia Maromak, hau hamahon aan iha Ita Boot.
Iha ema buka atu halo aat hau;
tulun hau no salva hau ba.
2 Se lae, sira hanesan liaun lees matak tiha hau;
sira sei lees hau nia isin halo rohan-rohan, ema atu salva hau la iha.
3-4 NAI, hau nia Maromak, hau nia sala saida?
Hau halo aat ba hau nia belun ka?
Hau halo violensia arbiru deit hasoru hau nia inimigu ka?
Se karik hau halo buat sira nee,
5 entaun husik hau nia inimigu duni hau hodi kaer tiha hau ba;
husik nia sama hau ba rai
too latan tiha hau iha rai rahun.
6 NAI Maromak, hamriik ho hirus ba.
Tuba rai metin hodi hasoru hau nia inimigu tanba sira nia laran nakali.
Hau nia Maromak, hadeer ona ba hodi foo sai lia loos.
7 Halibur hamutuk povu husi rai hotu-hotu para haleu Ita Boot;
tuur iha fatin aas hodi ukun sira.
8 NAI mak tesi povu sira nia lia.
NAI, hau ema ida nebee moris loos no la sala ida.
Maromak Aas Liu, foo justisa mai hau ba.
9 Maromak, Ita Boot sempre halo buat nebee loos;
Ita Boot koko ema nia neon ho laran.
Hapara tiha ema aat sira nia hahalok aat;
foo hakmatek ba ema nebee moris loos.
10 Maromak mak defende hau;
Nia salva ema sira nebee laran moos.
11 Maromak sempre tesi lia ho loos;
loro-loron Nia hamonu kastigu ba ema aat.
12 Se sira la hakribi sira nia sala,
entaun Maromak sei kadi Nia surik,
Nia sei dada Nia rama atu hana.
13 Sasaan kroat para hamate ema, Nia prepara tiha ona;
rama oan nebee Nia atu hana, Nia sunu lakan tiha ona.
14 Haree ba, ema sira nee kuda hahalok aat,
sira haburas hanoin aat
hodi foo rezultadu liafuan bosok.
15 Sira kee rai kuak ba ema seluk,
maibee sira rasik monu tama ba laran.
16 Hahalok aat nebee sira halo kona fali sira;
violensia nebee sira halo hanehan fali sira nia ulun.
17 Hau sei foo agradese ba NAI Maromak tanba Nia sempre halo buat nebee loos;
hau sei hananu hahii NAI Maromak Aas Liu nia naran.