6
Ema moras halerik husu tulun
Salmu David nian, ba dirijenti koru. Akompanha ho viola tali walu.
1 NAI Maromak, maski Ita Boot hirus hela hau, maibee keta siak hau;
maski Ita Boot nia laran nakali hela, maibee keta kastigu hau.
2 NAI, hau nia forsa lakon tiha, hanoin hau ba!
NAI, hau nia ruin sira moras hotu kura hau ba!
3 Hau nia laran susar teb-tebes.
Too bainhira NAI, too bainhira?
4 NAI, see Ita Boot nia oin mai hau;
salva hau ba!
Hatudu Ita Boot nia domin rohan-laek mai hau
hodi hasai hau husi susar laran.
5 Tanba ema nebee mate ona la temi tan Ita Boot nia naran.
Iha ema mate sira nia fatin, see mak atu hahii Ita Boot?
6 Hau halerik too kole teb-tebes;
kalan tomak, hau nia matan been suli habokon hau nia kama;
hau tanis too hau nia toba fatin bokon hotu.
7 Hau nia matan sai malahuk tiha tanba hau nia laran dodok nee;
hau nia matan haree la moos ona tanba hau nia inimigu sira nia hahalok.
8 Imi hotu nebee halo buat aat, hadook aan husi hau,
tanba NAI Maromak rona ona hau nia halerik.
9 Hau husu tulun ba NAI, Nia rona ona hau;
NAI simu hau nia orasaun.
10 Hau nia inimigu sira hotu sei moe ho tauk teb-tebes;
derepenti sira hakiduk ho moe boot.