5
Orasaun iha dadeer-saan atu Nai Maromak proteje
Salmu David nian, ba dirijenti koru. Akompanha ho korneta.
1 NAI Maromak, see tilun ba hau nia liafuan;
foo atensaun ba hau nia halerik.
2 Hau nia Liurai, hau nia Maromak,
hau harohan husu tulun ba Ita Boot deit;
rona hau nia orasaun ba.
3 NAI Maromak, dadeer-dadeer Ita Boot rona hau nia lian;
iha dadeer-saan hau hasae hau nia orasaun ba Ita Boot
hodi hein Ita Boot nia resposta.
4 Tanba Ita Boot Maromak ida nebee la haksolok ho hahalok aat;
buat aat la bele hela iha Ita Boot nia prezensa.
5 Ema nebee foti aan la bele hamriik iha Ita Boot nia oin;
Ita Boot odi ema aat hotu-hotu.
6 NAI Maromak, Ita Boot sempre harahun bosok-teen sira;
Ita Boot hakribi ema nebee hamrook raan ho lohi door sira.
7 Maibee tanba Ita Boot nia domin rohan-laek,
hau bele tama iha Ita Boot nia uma;
hau hakruuk ba Ita Boot nia fatin santu
hodi adora Ita Boot.
8 NAI Maromak, hanorin hau atu moris tuir Ita Boot nia lia loos
tanba hau iha inimigu barak;
halo tetuk Ita Boot nia dalan iha hau nia oin para hau bele lao tuir.
9 Liafuan nebee sai husi hau nia inimigu sira nia ibun, la iha ida mak loos;
sira nia laran nakonu ho hanoin aat.
Sira nia kakorok hanesan rate nebee nakloke;
sira nia liafuan kos-kose ema.
10 Maromak, tesi sira nia lia hodi kastigu sira;
husik sira nia manobra halo sira rasik monu.
Sira kontra ona Ita Boot;
hasai sira husi Ita Boot nia prezensa tanba sira nia sala barak.
11 Maibee see-see deit mak buka mahon iha Ita Boot, sira kontenti;
sira sempre hananu haksolok.
Proteje ema nebee hadomi Ita Boot
atu nunee sira nia laran bele haksolok.
12 Tebes duni, NAI Maromak, Ita Boot foo bensaun ba ema nebee moris loos;
Ita Boot nia laran diak haleu sira hodi defende sira.