4
Orasaun molok deskansa kalan
Salmu David nian, ba dirijenti koru. Akompanha ho viola.
1 Maromak, Ita Boot sempre defende hau;
hataan hau bainhira hau bolu Ita Boot!
Uluk hau iha fatin kloot, Ita Boot foo fatin luan mai hau;
hanoin hau ba, rona hau nia orasaun.
2 Imi ema sira nee, imi atu hafoer hau nia naran too bainhira?
Too bainhira loos mak imi gosta buat nebee la iha folin,
no duni tuir lia falsu?
3 Keta haluha katak NAI Maromak hili tiha ona ema nebee moris loos hodi sai Ninian;
NAI rona bainhira hau bolu Nia.
4 Maski tauk ho nakdedar, maibee la bele halo sala;
bainhira o iha o nia toba fatin, hakmatek hodi reflete aan.
5 Fiar ba NAI Maromak
hodi oferese sakrifisiu nebee loos ba Nia.
6 Iha ema barak mak husu, “See mak sei foo moris diak ba ami?
NAI, leno ami ho Ita Boot nia oin.”
7 Ksolok nebee Ita Boot foo tiha ona mai hau
boot liu fali ksolok nebee sira hetan husi sira nia ai haan ho tua bar-barak.
8 NAI, hau sei toba dukur ho hakmatek;
Ita Boot deit mak halo hau moris seguru.