11
Laran metin ba NAI Maromak iha susar laran
Salmu David nian, ba dirijenti koru.
1 NAI Maromak mak hau nia mahon.
Nusaa mak imi dehan fali mai hau,
“Salva o nia aan hanesan manu fuik nebee mak semo ba foho.
2 O haree ka lae, ema aat sira prepara hela sira nia rama;
sira tau hela rama oan ba rama inan;
sira hein iha fatin nakukun atu hana ema diak sira.
3 Bainhira lei nia huun rahun tiha ona,
ema nebee moris loos atu halo saida tan?”
4 NAI Maromak iha hela Nia uma santu;
NAI tuur hela iha Nia kadeira ukun iha lalehan.
Nia matan haree tu-tuir ema hotu-hotu iha mundu
hodi koko sira.
5 Ema nebee moris loos ho mos ema aat sira, NAI koko hotu;
ema nebee gosta violensia, Maromak hakribi.
6 Nia sei fakar tuun ahi klaak ho fatuk lakan ba ema aat sira;
Nia sei haruka anin manas hodi halo terus sira.
7 NAI sempre halo buat nebee loos;
Nia gosta hahalok nebee loos;
ema diak sei haree Nia oin.