12
Orasaun bainhira iha ema aat sira nia klaran
Salmu David nian, ba dirijenti koru. Akompanha ho viola tali walu.
1 NAI Maromak, salva ami ba! Tanba ema nebee moris loos la iha tan ona;
ema nebee foo laran ba Ita Boot, sira lakon mohu tiha ona husi mundu nee.
2 Hela deit ema nebee gosta lohi sira nia maluk;
sira nia ibun kos-kose ema;
sira nia laran nakonu ho buat bosok.
3 Hau harohan atu NAI Maromak taka tiha ibun nebee kos-kose ema,
hapara tiha nanaal nebee nakonu ho gaba aan.
4 Ema sira nee dehan, “Hodi ami nia liafuan, ami sei manaan;
saida mak ami hakarak koalia, ami koalia deit; see mak atu manda tan ami?”
5 NAI Maromak dehan, “Sira hanehan ema kiak;
sira halo ema kbiit-laek halerik.
Nunee Hau sei hamriik;
Hau sei hatuur ema kbiit-laek sira iha fatin seguru nebee durante nee sira hein hela.”
6 NAI nia promesa perfeitu hotu,
hanesan osan mutin nebee hamoos dala hitu ona iha ahi.
7 NAI Maromak, Ita Boot sei kuidadu ema kbiit-laek sira;
Ita Boot sei hamahon ami husi ema aat sira tinan ba tinan.
8 Ema hotu-hotu iha mundu gaba hahalok aat,
too ema aat sira lao livre iha fat-fatin.