112
Ema diak hetan ksolok
1 Hahii NAI Maromak!
Ema nebee hamtauk NAI Maromak,
no gosta teb-tebes Nia ukun fuan,
sira hetan ksolok.
2 Sira nia oan sira naran boot iha rai nee;
ema moris loos nia jerasaun sei hetan bensaun.
3 Sira nia uma laran sei iha riku-soin bar-barak;
sira nia hahalok diak nafatin too tinan ba tinan.
4 Maski iha nakukun laran, naroman sempre leno ema nebee laran moos;
sira nee laran diak, laran luak no moris loos.
5 Ema nebee liman nakloke hodi foo empresta osan ba ema seluk,
no halao sira nia moris ho lo-loos,
sira hetan diak.
6 Tebes duni, ema nebee moris ho laran moos nunka atu nakdoko;
ema seluk sei hanoin nafatin sira tinan ba tinan.
7 Sira sei la tauk bainhira rona notisia nebee la diak;
sira nia laran metin, sira abut metin iha NAI Maromak.
8 Sira nia laran hakmatek, sira sei la tauk;
too ikus sira haree sira nia inimigu lakon.
9 Sira fahe buat bar-barak ba ema kiak sira;
sira nia hahalok diak iha nafatin too tinan ba tinan;
sira sei makaas, no hetan respeitu.
10 Haree nunee, ema aat sira sei hirus;
sira sei ruun nehan too sira lakon mohu tiha;
ema aat sira nia hakarak sei la vale tiha.