137
Israel oan sira halerik iha ema nia rain tanba Jerusalém rahun
1 Iha mota Babilónia nia ninin, ami tuur hodi tanis halerik
bainhira ami hanoin kona ba Siaun.
2 Iha mota ninin nee ami tara ami nia viola
iha ai huun nia sanak.
3 Tanba iha nebaa ema nebee halo ami dadur haruka ami kanta;
ema nebee halo ami terus obriga ami hananu knananuk ksolok nian;
sira haruka ami hananu kantiku ida kona ba Siaun iha sira nia oin.
4 Oinsaa mak ami bele hananu ba NAI Maromak
durante ami iha hela ema nia rain?
5 Jerusalém, se karik hau haluha o,
husik ba, hau nia liman loos nia forsa lakon tiha ba.
6 Jerusalém, se karik hau la hanoin kona o,
se karik hau la konsidera o nudar ksolok ida nebee boot liu mai hau,
husik hau nia nanaal toos tiha iha hau nia ibun laran ba.
7 NAI Maromak, keta haluha buat nebee mak ema Edom halo
iha loron nebee sidade Jerusalém monu.
Sira hakilar dehan, “Halo rahun tiha;
halo rahun too nia huun!”
8 Babilónia oan sira, susar boot sei kona imi.
Ema nebee mak selu fali imi nia hahalok aat hasoru ami,
sira hetan ksolok.
9 Ema nebee hadau imi nia oan kiik oan sira hodi riba ba fatuk,
sira hetan ksolok.