138
Kantiku agradese tanba Nai Maromak nia tulun
Salmu David nian.
1 NAI Maromak, ho laran tomak hau foo agradese ba Ita Boot;
iha maromak sel-seluk nia oin, hau hananu hahii Ita Boot.
2 Hau see oin hakruuk ba iha Ita Boot nia fatin santu,
no hahii Ita Boot nia naran,
tanba Ita Boot nia domin rohan-laek no Ita Boot sempre kaer metin Ita Boot nia liafuan;
Ita Boot tane Ita Boot nia naran ho Ita Boot nia liafuan aas liu buat hotu-hotu.
3 Bainhira hau halerik husu tulun, Ita Boot hataan hau;
Ita Boot nia kbiit halo hau aten brani.
4 NAI Maromak, hau harohan atu liurai hotu-hotu iha mundu nee bele hahii Ita Boot
bainhira sira rona liafuan nebee sai husi Ita Boot nia ibun.
5 Hau harohan atu sira hananu kona ba NAI nia dalan,
tanba NAI nia kbiit boot.
6 Maski NAI iha leten aas ba, Nia haree diak ema kiik,
maibee ema foti aan sira, Nia konhese husi dook deit.
7 Maski hau lao iha susar laran,
Ita Boot proteje hau nia vida.
Bainhira hau nia funu baluk sira hirus, Ita Boot nia liman kontra sira;
Ita Boot salva hau hodi Ita Boot nia liman loos.
8 NAI, Ita Boot nia planu ba hau sei sai realidade;
Ita Boot nia domin dura tinan ba tinan;
NAI, keta husik hela Ita Boot nia liman fatin mes-mesak.