139
Orasaun ba Nai Maromak Matenek Nain
Salmu David nian, ba dirijenti koru. Kantiku.
1 NAI Maromak, Ita Boot koko tiha ona hau,
no konhese hau mo-moos.
2 Atu hau tuur ka hau hamriik, Ita Boot hatene hotu;
husi dook Ita Boot hatene hau nia hanoin.
3 Atu hau lao ka hau toba, Ita Boot haree tuir;
Ita Boot hatene hau nia moris tomak.
4 NAI, molok liafuan ruma sai husi hau nia ibun,
Ita Boot hatene hotu ona.
5 Ita Boot besik loos hau husi oin no husi kotuk;
Ita Boot tula Ita Boot nia liman ba iha hau nia leten.
6 Ita Boot konhese mo-moos hau nunee, furak teb-tebes mai hau;
matenek hanesan nee aas teb-tebes, hau la bele kompriende too iha nebaa.
7 Hau tenki baa iha nebee atu bele haketak aan husi Ita Boot nia Espiritu?
Hau tenki halai baa iha nebee atu bele sees husi Ita Boot nia oin?
8 Hau sae ba iha lalehan, Ita Boot iha nebaa;
hau halo hau nia toba fatin iha matebian sira nia fatin, Ita Boot iha nebaa.
9 Se hau semo ba iha lorosae,
ka halo hau nia hela fatin iha tasi nia rohan ba,
10 iha nebaa mos Ita Boot nia liman sei hatudu dalan mai hau;
Ita Boot nia liman loos kaer metin hau.
11 Karik hau dehan, “Husik nakukun subar tiha hau;
husik naroman nebee haleu hau sai fali nakukun.”
12 Maibee iha nakukun laran mos Ita Boot nia matan haree borus;
ba Ita Boot, kalan iha naroman hanesan fali loron nian;
ba Ita Boot, nakukun ho naroman hanesan deit.
13 Ita Boot mak kria hau nia laran;
Ita Boot soru hau hamutuk iha hau nia inan nia kabun laran.
14 Hau hahii Ita Boot tanba Ita Boot nee makaas;
hau rekonhese ho laran tomak katak,
Ita Boot nia liman fatin furak teb-tebes.
15 Bainhira Ita Boot forma hau iha fatin segredu,
iha momentu Ita Boot suku hau iha hau nia inan nia kabun laran hanesan ema suku borda,
Ita Boot haree mo-moos hau nia ruin sira nee.
16 Hau nia isin lolon seidauk forma hamutuk,
Ita Boot nia matan haree tiha ona hau.
Hau nia loron moris mai seidauk too,
loron hotu-hotu nebee Ita Boot atu foo mai hau, hakerek tiha ona iha Ita Boot nia livru.
17 Maromak, Ita Boot nia hanoin, hau imajina la hetan;
Ita Boot nia ideia barak teb-tebes, sura la bele.
18 Hau atu sura karik,
barak liu fali rai henek musan iha mundu;
bainhira hau hadeer, hau sei hamutuk nafatin ho Ita Boot.
19 Maromak, hau hein atu Ita Boot hamate tiha ema aat sira.
Imi sira nebee hamrook ba raan, dook tiha husi hau.
20 Sira koalia aat kona ba Ita Boot;
sira hatete aat Ita Boot nia naran.
21 NAI, hau odi ema nebee mak odi Ita Boot;
hau hakribi ema nebee kontra Ita Boot.
22 Hau odi loos sira;
hau konsidera sira nee hau nia inimigu.
23 Maromak, koko hau hodi hatene tuir hau nia laran;
prova hau hodi hatene hau nia hanoin.
24 Haree ba, keta hau halo buat aat ruma karik;
lori hau tuir dalan moris rohan-laek nian.