140
Orasaun husu atu Nai Maromak proteje
Salmu David nian, ba dirijenti koru.
1 NAI Maromak, salva hau husi ema aat ba;
proteje hau husi ema nebee gosta violensia.
2 Sira sempre hanoin aat;
loron-kalan sira sadik ema atu halo funu.
3 Sira halo sira nia liafuan kroat hodi hakanek ema hanesan samea nebee tata ema;
liafuan nebee sai husi sira nia ibun hanesan samodok nia veneno.
4 NAI Maromak, kuidadu hau atu ema aat nia liman keta kona hau;
proteje hau husi ema nebee gosta violensia,
tanba sira kombina malu atu hamonu hau.
5 Ema foti aan sira tau ona lasu mai hau;
sira nahe redi mai hau;
sira monta gaiola iha hau nia dalan.
6 Hau hatete ba NAI, “Ita Boot mak hau nia Maromak.”
NAI, hau halerik husu tulun, rona hau ba.
7 NAI, hau nia Maromak, Ita Boot nia kbiit makaas hodi salva hau;
Ita Boot taka hau nia ulun iha funu laran.
8 NAI, keta foo dalan ba ema aat sira nia hakarak;
keta husik sira nia planu sai realidade, se lae sira sei foti aan.
9 Ema nebee haleu hau foti sira nia ulun;
husik liafuan aat nebee sira hatete mai hau, fila fali ba sira.
10 Halo ahi klaak monu tuun iha sira nia leten;
halo sira monu tama ba iha rai kuak klean, nunka atu sai fali.
11 Hau hein katak sira nebee gosta hatete aat ema, la bele hela metin iha rai nee;
husik dezastre duni tuir ema nebee gosta violensia.
12 Hau hatene katak NAI Maromak foo justisa lo-loos ba ema kbiit-laek
hodi defende ema kiak sira.
13 Loos duni, ema nebee moris loos sei hahii Ita Boot nia naran;
ema nebee laran moos sei hela iha Ita Boot nia prezensa.