55
Halerik bainhira belun diak sai fali inimigu
Salmu David nian para hanorin ema. Akompanha ho viola. Ba dirijenti koru.
1 Maromak, see tilun ba hau nia orasaun;
keta fila kotuk ba hau nia hamulak.
2 Rona hau hodi hataan hau ba;
hau hanoin la hetan too hau nia laran dodok.
3 Tanba hau nia inimigu sira hakilar hau;
ema aat ameasa hau;
sira hanehan hau;
sira odi hau ho laran nakali.
4 Hau nia fuan nakdedar;
ameasa mate nian hanehan hau.
5 Hau tauk ho nakdedar
too isin fulun hamriik.
6 Hau hanoin, “Diak liu hau iha liras manu pombu nian,
atu hau bele semo sai hodi hakmatek.
7 Hau atu semo dook
baa hela iha rai fuik;
8 hau atu baa lalais buka fatin mahon,
dook husi anin boot ho udan boot.”
9 Nai Maromak, halo ema aat sira nia neon lakon tiha;
husik sira koalia arbiru ba,
tanba hau haree violensia ho rungu-ranga iha sidade laran.
10 Loron-kalan sira lao haleu sidade hodi kontrola iha moru leten;
iha moru laran nakonu ho hanoin aat ho krimi.
11 Estraga door sira lao hela iha sidade nee;
iha estrada ninin sira hanehan ema no haan matak ema nia riku-soin la para.
12 Se karik hau nia inimigu mak hatete aat hau,
hau sei aguenta;
se karik funu baluk ida mak foti aan hasoru hau,
hau sei bele subar aan husi nia.
13 Maibee o mak halo fali, o ho hau hanesan;
o nee hau nia maluk, hau nia belun diak.
14 Ita nain rua uluk ranxu malu diak loos;
ita tama iha Maromak nia uma kreda iha ema barak nia leet.
15 Husik hau nia inimigu sira mate mean;
husik sira tuun moris ba ema mate sira nia fatin,
tanba hahalok aat iha hela sira nia uma,
iha hela sira nia laran.
16 Maibee hau harohan ba NAI Maromak
mak Maromak salva hau.
17 Iha tempu kalan, dadeer-saan ho meudia,
hau halerik ho laran susar;
Nia rona hau nia lian.
18 Nia salva hau;
maski ema nadodon mai hodi ataka hau,
buat ida la kona hau.
19 Maromak nee Liurai hori uluk kedas;
Nia sei rona hau hodi hatuun sira,
tanba sira nee lakohi arepende,
no la hamtauk Maromak.
20 Hau nia kolega ataka fali nia maun-alin koran sira;
nia kontra fali nia promesa ho sira.
21 Nia koalia ho ibun midar,
maibee nia laran hakarak funu;
nia liafuan kabeer liu fali mina,
maibee kroat hanesan surik.
22 Entrega o nia preokupasaun ba NAI Maromak
mak Nia sei kuidadu o;
Nia nunka husik ema nebee moris loos atu nakdoko.
23 Maibee Maromak, Ita Boot sei soe tuun tiha ema aat sira
ba iha rai kuak naruk;
oho-door ho traidor sira nia vida sei la naruk;
sira mate ho tinan badak.
Maibee hau nee konfia Ita Boot.