56
Laran metin ba Nai Maromak iha tempu susar
Salmu David nian, bainhira ema Filístia sira kaer nia iha sidade Gat. Salmu nee para hanorin ema. Tuir muzika “Manu pombu iha ai huun nebee dook.” Ba dirijenti koru.
1 Maromak, hatudu Ita Boot nia laran luak mai hau,
tanba ema sama hela hau;
loron-kalan hau nia inimigu sira hanehan hau.
2 Hau nia funu baluk sira sama hela hau loron-kalan;
ema barak foti aan ataka hau.
3 Maromak Aas Liu, bainhira hau tauk,
hau konfia Ita Boot.
4 Hau hahii Maromak tanba buat nebee Nia promete ona;
hau fiar Nia, nunee hau la tauk.
Ema mundu nee bele halo saida ba hau?
5 Loron-kalan hau nia inimigu sira bobar hau nia liafuan;
sira sempre iha hanoin aat ba hau.
6 Sira kombina malu;
sira hafuhu hau;
sira haree tu-tuir hau nia dalan;
sira hakarak atu hasai hau nia vida.
7 Maromak, keta husik sira moris, tanba sira nia hahalok aat;
hamonu nasaun jentiu sira ho hirus ba.
8 Hau nia terus Ita Boot mak sura;
hau nia matan been Ita Boot tau iha botir.
Buat sira nee hotu Ita Boot hakerek iha Ita Boot nia livru.
9 Bainhira hau harohan,
hau nia inimigu sira sei hakiduk.
Hau hatene katak Maromak hamutuk ho hau.
10 Hau hahii Maromak tanba buat nebee Nia promete ona;
hau hahii NAI Maromak tanba promesa nebee Nia halo.
11 Hau fiar Maromak, nunee hau la tauk.
Ema mundu nee bele halo saida ba hau?
12 Maromak, hau sei kumpri hau nia juramentu ba Ita Boot;
hau sei foo oferta agradesimentu nian ba Ita Boot.
13 Tanba Ita Boot hasai tiha ona hau husi mate;
Ita Boot kuidadu hau nia ain la sidi,
nunee hau bele lao iha Maromak nia oin,
iha naroman moris nian.