57
Orasaun ho laran metin ba Nai Maromak iha tempu susar
Salmu David nian, bainhira nia halai sees husi Saul hodi tama iha fatuk kuak laran. Salmu nee para hanorin ema. Tuir muzika “Keta harahun.” Ba dirijenti koru.
1 Maromak, hatudu Ita Boot nia laran luak mai hau;
hanoin hau ba,
tanba hau hamahon aan iha Ita Boot.
Hau sei hamahon aan iha Ita Boot nia liras okos
too dezastre liu tiha.
2 Hau harohan ba Maromak Aas Liu;
hau husu tulun ba Maromak tanba Nia halo buat diak mai hau.
3 Nia sei hatuun salvasaun husi lalehan mai hau;
Nia sei hamoe ema sira nebee mak sama hau.
Maromak haraik Nia domin rohan-laek ho Nia lia loos.
4 Hau toba hela iha liaun nia klaran;
sira gosta lees matak ema hodi haan;
sira nia nehan hanesan diman ho rama oan;
sira nia nanaal kroat hanesan surik.
5 Maromak, hatudu Ita Boot nia Aan aas liu lalehan;
halo Ita Boot nia kbiit domina mundu tomak.
6 Hau nia inimigu sira monta tiha ona redi ba hau nia ain;
hau sai muroon tiha;
sira kee rai kuak iha dalan nebee hau atu liu,
maibee sira rasik mak monu tama ba laran.
7 Maromak, hau laran metin ba Ita Boot;
hau nia laran metin;
hau sei toka muzika hodi hananu hahii Ita Boot.
8 Hau hatete ba hau nia aan, hadeer ba!
Viola ho viola tali sanulu, hadeer ba!
Hau sei fanu loro matan.
9 Nai Maromak, hau sei hahii Ita Boot iha nasaun hotu-hotu nia klaran;
hau sei hananu ba Ita Boot iha povu sira nia leet,
10 tanba Ita Boot nia domin boot too iha lalehan;
Ita Boot nia lia loos firmi too iha kalohan.
11 Maromak, hatudu Ita Boot nia Aan aas liu lalehan;
halo Ita Boot nia kbiit domina mundu tomak.