58
Orasaun husu justisa
Salmu David nian para hanorin ema. Tuir muzika “Keta harahun.” Ba dirijenti koru.
1 Ukun nain sira, imi koalia lia loos ka?
Imi tesi ema nia lia ho lo-loos ka lae?
2 Lae, imi nia hanoin aat;
imi nia liman halao violensia iha rai.
3 Husi kabun laran kedas ema aat lao sala dalan;
moris mai kedas sira lao sala hodi bosok ema.
4 Sira iha veneno hanesan samea nia veneno,
hanesan samea kobra nebee taka tiha nia tilun
5 para nia nain toka muzika, nia la bele rona;
muzika bele kapaas mos, nia lakohi atu rona.
6 Maromak, harahun tiha sira nia nehan iha sira nia ibun laran;
NAI, halo tohar tiha liaun sira nee nia nehan ba.
7 Husik sira lakon hanesan bee nebee suli lakon;
husik sira sai namlaik hanesan duut iha dalan.
8 Halo sira mohu hanesan karakol nia kabeen nebee maran tu-tuir;
halo sira hanesan bebee nebee abortu tiha, nunka hetan loro matan.
9 Molok ema bele sunu ai sanak lotuk hodi hamanas sanan,
Maromak sei dasa sai tiha ema aat sira.
10 Ema moris loos sei haksolok bainhira sira haree Maromak kastigu ema aat sira;
sira sei solur sira nia ain iha ema aat sira nia raan laran.
11 Ema sei dehan, “Loos duni, ema moris loos sei simu nia kolen;
tebes, Maromak mak foo justisa ba mundu.”