59
Husu tulun ba Nai Maromak hodi kontra inimigu
Salmu David nian, bainhira Saul haruka ema hafuhu David nia uma para oho nia. Salmu nee para hanorin ema. Tuir muzika “Keta harahun.” Ba dirijenti koru.
1 Maromak, salva hau husi hau nia inimigu sira;
satan netik hau husi sira nebee mak ataka hau.
2 Salva hau husi ema sira nebee halo aat;
hasai hau husi ema oho door sira nia liman laran.
3 NAI Maromak, haree ba, sira hein hela hau atu hakotu hau nia vida;
ema forti sira kombina malu hodi kontra hau;
afinal hau la halo buat ida ba sira.
4 Hau la sala, maibee sira halai mai atu asalta hau.
Hamriik hodi tulun hau, haree rasik ba.
5 NAI Maromak Aswain,
Ita Boot mak Israel nia Maromak;
hadeer ba hodi kastigu nasaun jentiu sira;
keta hanoin tan traidor laran aat sira.
6 Sira fila iha oras kalan,
hakilar hanesan asu nebee hatenu
hodi lao haleu sidade.
7 Haree ba, sira fakar sai liafuan tarata husi sira nia ibun;
liafuan nebee sai husi sira nia ibun kroat hanesan surik;
sira hanoin dehan, “See mak atu rona?”
8 Maibee NAI Maromak, Ita Boot hamnasa fali sira;
Ita Boot goza fali nasaun jentiu sira nee hotu.
9 Ita Boot mak hau nia forsa, hau laran metin ba Ita Boot;
Maromak, Ita Boot mak hau nia abrigu.
10 Hau nia Maromak nia domin rohan-laek, Nia sei mai simu hau;
hau nia Maromak sei halo hau manaan hau nia inimigu sira.
11 Nai Maromak, Ita Boot defende ami;
keta oho sira, atu nunee hau nia povu la bele haluha.
Ho Ita Boot nia kbiit halo sira namkari
hodi hatuun tiha sira ba.
12 Sala sai husi sira nia ibun;
sira nia ibun koalia buat aat,
nunee husik sira nia hahalok foti aan sai lasu ba sira nia aan rasik.
Sira gosta foo malisan no koalia liafuan bosok,
13 nunee hamohu sira ho Ita Boot nia hirus ba;
hamohu sira too sira la iha tan.
Depois ema husi rai ulun too rai ikun hatene katak,
Maromak ukun Jacó nia jerasaun.
14 Sira fila iha oras kalan,
hakilar hanesan asu nebee hatenu
hodi lao haleu sidade.
15 Sira lao rai buka ai haan;
bainhira sira la bosu, sira hakilar.
16 Maibee hau sei hananu kona ba Ita Boot nia forsa;
iha dadeer-saan hau sei kanta sai Ita Boot nia domin rohan-laek,
tanba Ita Boot mak hau nia abrigu,
hau nia subar fatin iha tempu susar.
17 Ita Boot mak hau nia forsa; hau hananu hahii Ita Boot;
Maromak, Ita Boot mak hau nia abrigu;
hau nia Maromak, Ita Boot hadomi hau.