60
Orasaun husu atu manaan funu
Salmu David nian, bainhira David funu hasoru ema Aram Naharaim ho Aram Zoba. Iha tempu nebaa, Joab fila fali hodi oho tiha ema Edom rihun sanulu resin rua iha Rai Masin. Salmu nee para hanorin ema. Tuir muzika “Ai funan promesa nian.” Ba dirijenti koru.
1 Maromak, Ita Boot soe tiha ona ami, halo ami lakon;
Ita Boot hirus hela ami, simu fali ami ba!
2 Ita Boot halo rai nakdoko hodi fera rai nakloke tiha;
halo tomak fila fali ba, tanba atu naksobu ona.
3 Ita Boot halo Ita Boot nia povu terus aat liu ona;
Ita Boot obriga ami hemu tua too lanu todan.
4 Maibee ema nebee hamtauk Ita Boot,
Ita Boot foo sinal atu sira sees aan husi rama oan.
5 Hodi Ita Boot nia liman loos salva ami no tulun ami ba,
atu nunee ema nebee Ita Boot hadomi bele hetan salvasaun.
6 Maromak lia tuun husi Nia hela fatin dehan,
“Hau sei manaan!
Hau sei fahe rai Sikem ba Hau nia povu;
Hau sei sukat rai Sukot.
7 Rai Gileade Hau nian,
rai Manassés mos Hau nian;
ema Efraim Hau nia kapaseti,
ema Judá Hau nia rota.
8 Rai Moab Hau nia basia hodi fase liman;
rai Edom fatin para soe Hau nia sandalias ba;
Hau haksolok haklalak tanba Hau manaan rai Filístia.”
9 Maromak, see loos mak atu lori hau ba iha sidade nebee forti?
See loos mak atu lori hau ba iha rai Edom?
10 Maromak, Ita Boot soe duni ami ka?
Maromak, Ita Boot lakohi avansa ho ami nia militar sira ka?
11 Tulun ami hodi kontra inimigu sira,
tanba ema kriatura nia ajuda la iha folin.
12 Hamutuk ho Maromak ita sei manaan;
Nia sei sama ita nia inimigu sira.