62
Laran metin ba Nai Maromak
Salmu David nian, ba dirijenti koru Jedutun.
1 Hau besik Maromak mak hau nia laran hakmatek;
so Nia deit mak bele salva hau.
2 Nia mak fatuk lolon boot nebee hau helik ba;
Nia mak hau nia Salvador.
Nia mak hau nia abrigu;
la iha buat ida bele doko hau.
3 Imi hotu atu ataka hau too bainhira?!
Imi atu hamonu hau
hanesan fali imi hamonu moru nebee haliis tiha ona
ka lutu nebee besik naksobu.
4 Ema sira nee halo planu atu hatuun hau husi hau nia fatin aas;
sira gosta bosok.
Sira nia ibun foo bensaun,
maibee sira nia laran foo malisan.
5 Hau besik Maromak mak hau nia laran hakmatek;
Nia deit mak foo esperansa mai hau.
6 Nia mak fatuk lolon boot nebee hau helik ba;
Nia mak hau nia Salvador.
Nia mak hau nia abrigu;
la iha buat ida bele doko hau.
7 Maromak mak salva hau no tane aas hau;
Nia mak fatuk lolon boot teb-tebes nebee hau helik ba;
Nia mak foo mahon mai hau.
8 Maluk sira, konfia ba Maromak iha imi nia moris tomak;
saida mak iha imi nia laran fakar sai ba Nia,
tanba Maromak mak foo mahon mai ita.
9 Ema kiik sira hanesan buat mamuk ida;
ema boot sira hanesan lia mamuk deit.
Se tetu iha dasin karik,
sira hotu kamaan liu fali anin.
10 Keta mehi atu uza violensia hodi sai riku;
keta laran metin ba sasaan nebee o hadau husi ema.
Se karik o nia riku-soin aumenta barak mos,
lalika laran metin ba riku-soin nee.
11 Maromak koalia tiha ona;
hau rona fila-fila ona katak,
kbiit tomak Maromak nian;
12 Nai Maromak, Ita Boot nia domin nunka hotu.
Ita Boot selu ema ida-idak
tuir buat nebee sira halo tiha ona.