63
Hamrook ba Nai Maromak
Salmu David nian, bainhira nia iha rai fuik maran Judá nian.
1 Maromak, Ita Boot mak hau nia Maromak;
hau hakarak teb-tebes atu besik Ita Boot;
hau nia laran hamrook ba Ita Boot;
hau nia aan tomak buka Ita Boot;
hau hanesan rai nebee maran dekor,
krekas, la iha bee.
2 Hau haree tiha ona Ita Boot iha fatin santu;
hau fihir Ita Boot nia kbiit ho Ita Boot nia forsa.
3 Ita Boot nia domin diak liu fali vida,
nunee hau nia ibun sei hahii Ita Boot.
4 Hau nia moris tomak hau sei agradese ba Ita Boot;
hau sei foti sae hau nia liman hodi harohan ba Ita Boot.
5 Ita Boot sei habosu hau ho hahaan mesak di-diak deit;
hau sei hananu ho haksolok hodi hahii Ita Boot.
6 Iha hau nia toba fatin hau hanoin kona Ita Boot;
iha kalan tomak hau medita kona ba Ita Boot,
7 tanba Ita Boot mak tulun hau;
iha Ita Boot nia liras okos, hau hamahon aan hodi hananu ho haksolok.
8 Hau neon metin ba Ita Boot;
Ita Boot nia liman loos tane hau.
9 Maibee ema nebee hakarak hakotu hau nia vida,
sira sei tuun ba iha rai kuak naruk nia laran.
10 Sira sei mate ho surik;
sira sei sai asu fuik nia ai haan.
11 Maibee liurai sei haksolok tanba Maromak nia diak;
ema hotu nebee jura hodi Maromak nia naran sei hahii Nia,
tanba ema bosok-teen sira nia ibun sei taka metin tiha.