64
Orasaun husu tulun hasoru inimigu
Salmu David nian, ba dirijenti koru.
1 Hau nia Maromak, rona hau nia lia halerik;
hau nia inimigu hatauk hau, kuidadu hau nia vida ba.
2 Ema aat sira kombina malu hasoru hau, subar hau ba;
ema lubun boot gosta halo buat aat, proteje hau ba.
3 Sira halo kroat sira nia liafuan hanesan fali halo kroat surik;
sira nia ibun foo sai liafuan moruk hanesan rama inan tiru sai rama oan.
4 Sira hafuhu ema laran moos hodi tiru;
sira tiru lalais deit, la tauk buat ida.
5 Sira foo korajen ba malu ho planu aat;
sira foo ideia ba malu atu monta sira nia lasu iha fatin subar;
sira dehan, “See mak atu haree?”
6 Sira kombina malu ho planu aat hodi dehan,
“Ita prontu ona, ita nia planu diak loos ona.”
Tebes, ema nia fuan ho laran klean duni!
7 Maibee Maromak sei hana sira ho rama oan;
sira kanek derepenti deit.
8 Nia sei halo sira nia liafuan rasik kona fali sira
hodi hamohu tiha sira;
ema hotu nebee haree sei doko ulun hodi hatete aat sira.
9 Nunee ema hotu-hotu sei tauk;
sira sei rekonhese Maromak nia servisu;
sira sei foo sai buat diak nebee Maromak halo tiha ona.
10 Ema moris loos sei haksolok tanba NAI Maromak nia diak;
sira sei hamahon aan iha Nia;
ema hotu nebee moris ho laran moos sei tane aas Maromak nia naran.