65
Hananu agradese ba Nai Maromak nia bensaun
Salmu David nian. Kantiku ida, ba dirijenti koru.
1 Maromak, ami hahii Ita Boot iha sidade Siaun;
ami sei halo tuir ami nia promesa ba Ita Boot.
2 Ita Boot hataan ema nebee harohan ba Ita Boot;
ema hotu-hotu sei mai adora Ita Boot.
3 Bainhira sala barak hanehan ami,
Ita Boot hamoos tiha ami nia sala sira nee.
4 Ema sira nebee Ita Boot hili
hodi lori baa hela iha Ita Boot nia fatin santu,
ema sira nee hetan ksolok.
Iha Ita Boot nia uma,
iha Ita Boot nia uma kreda santu,
ami hetan buat mesak diak deit,
halo ami bosu.
5 Maromak ami nia Salvador,
Ita Boot hatudu Ita Boot nia forsa hodi hataan ami no salva ami.
Ema husi rai ulun too rai ikun iha mundu tomak konfia Ita Boot;
ema nebee hela iha tasi balu mos laran metin ba Ita Boot.
6 Ita Boot mak forma foho hodi Ita Boot nia kbiit,
Ita Boot hatudu sai Ita Boot nia forsa.
7 Ita Boot hapara tasi siak ho laloran boot;
Ita Boot hakalma nasaun sira nebee rungu-ranga.
8 Ema husi rai ulun too rai ikun iha mundu tomak
admira ho Ita Boot nia milagre;
ema husi lorosae too loromonu,
Ita Boot halo sira haklalak ho haksolok.
9 Ita Boot tau matan ba rai nee hodi rega rai
sai buras teb-tebes.
Mota Maromak nian, bee nakonu;
Ita Boot prepara rai nunee
para povu bele hetan ai haan.
10 Ita Boot hatuun udan ba rai nebee toos nain fila tiha ona;
Ita Boot foo udan been hodi halo rai sai mamar tiha;
Ita Boot foo bensaun ba ai horis sira.
11 Tanba Ita Boot nia diak mak tin-tinan Ita Boot foo rezultadu diak ba toos;
Ita Boot nia ain fatin halo rai sai bokur tiha.
12 Duut iha rai fuik sai matak ho buras;
foho sira mos haksolok hotu.
13 Iha rai luan bibi nakonu;
iha toos trigu buras;
hotu-hotu haklalak hananu ho haksolok.