66
Hahii Nai Maromak
Salmu. Kantiku ida, ba dirijenti koru.
1 Mundu tomak, haklalak ho haksolok ba Maromak;
2 hananu foti aas Nia naran ba;
hahii tane aas Nia naran!
3 Hatete ba Maromak dehan, “Ita Boot halo buat mesak furak!
Ita Boot nia kbiit boot teb-tebes,
halo Ita Boot nia inimigu hakruuk lambe rai iha Ita Boot nia futar oin.
4 Mundu tomak hakruuk ba Ita Boot;
sira hananu hahii Ita Boot;
sira hananu hahii Ita Boot nia naran.”
5 Mai hodi haree buat nebee Maromak halo tiha ona;
Nia halo buat mesak furak ba ita ema.
6 Nia halo tasi fila ba rai maran;
Nia povu lao ain hodi hakur mota.
Mai ita haksolok tanba Nia diak.
7 Nia ukun ho kbiit tinan ba tinan;
Nia matan haree nasaun jentiu sira;
ema nebee kontra Maromak lalika foti aan.
8 Povu jentiu sira, hahii ami nia Maromak ba;
hasae imi nia lian sai makaas hodi hahii Nia.
9 Nia kuidadu ami nia moris;
Nia halo ami nia ain hamriik metin.
10 Maromak, Ita Boot koko ona ami,
hanesan ema koko osan mutin.
11 Ita Boot lori tiha ona ami ba iha dadur laran;
Ita Boot tula naha todan ba iha ami nia kabaas.
12 Inimigu sira sae kuda sama ami nia ulun, Ita Boot husik deit;
ami lao ona liu husi ahi laran ho bee laran,
maibee too ikus Ita Boot lori ami ba iha fatin nebee nakonu ho buat diak.
13 Hau sei mai iha Ita Boot nia uma lori sakrifisiu tunu;
hau sei kumpri hau nia promesa
14 nebee mak hau nia ibun temi tiha ona,
buat nebee hau promete bainhira hau iha susar laran.
15 Hau sei oferese animal nebee bokur ba Ita Boot nudar sakrifisiu tunu;
hau sei tunu bibi malae aman halo suar morin sae;
hau sei oferese karau aman ho bibi aman ba Ita Boot.
16 Imi hotu nebee hamtauk Maromak, mai rona ba;
hau hakarak foo sai ba imi buat nebee mak Nia halo ona mai hau.
17 Uluk hau nia ibun husu tulun ba Nia ho lian makaas;
hau nia nanaal hahii hela Nia.
18 Se karik hau rai hela buat aat ruma iha hau nia laran,
Nai Maromak la rona hau nia orasaun.
19 Maibee Maromak rona duni;
Nia see tilun tiha ona ba hau nia orasaun.
20 Hahii Maromak,
tanba Nia nunka fila kotuk ba hau nia orasaun;
Nia la hakotu Nia domin rohan-laek mai hau.