67
Agradese ba Nai Maromak tanba hetan bensaun oi-oin
Salmu. Kantiku ida, akompanha ho viola, ba dirijenti koru.
1 Maromak, hanoin ami no foo bensaun ba ami;
halo Ita Boot nia oin nabilan leno ami,
2 atu nunee ema iha mundu nee bele hatene Ita Boot nia dalan;
nasaun hotu-hotu bele rekonhese Ita Boot nia kbiit atu salva ema.
3 Maromak, hau harohan atu povu hotu-hotu hahii Ita Boot;
nasaun hotu-hotu hahii Ita Boot.
4 Halo nasaun sira nee kontenti hodi hananu haksolok,
tanba Ita Boot ukun ema ho justisa
no hatudu dalan ba nasaun sira iha mundu.
5 Maromak, hau harohan atu povu hotu-hotu hahii Ita Boot;
nasaun hotu-hotu hahii Ita Boot.
6 Toos foo tiha ona nia rezultadu;
Maromak, ita nia Maromak, foo ona bensaun ba ita.
7 Maromak foo bensaun ba ita,
atu ema husi rai ulun too rai ikun iha mundu tomak hamtauk Nia.