68
Israel haklalak tanba manaan funu
Salmu David nian. Kantiku ida, ba dirijenti koru.
1 Bainhira Maromak hamriik, Nia inimigu sira halai namkari;
Nia funu baluk sira halai sees husi Nia oin.
2 Nia huu lakon tiha sira hanesan huu ahi suar;
ema aat sira sei mate mohu iha Maromak nia oin
hanesan lilin nebee nabeen bainhira besik ahi.
3 Maibee ema moris loos haksolok;
sira kontenti iha Maromak nia oin;
sira haklalak ho haksolok.
4 Hananu ba Maromak;
hananu hahii Nia naran.
Nia tuur iha kalohan leten;
foti aas Nia naran ba!
Nia naran mak NAI;
haksolok haklalak iha Nia oin ba!
5 Maromak iha hela Nia fatin santu, Nia mak aman ba oan kiak sira;
Nia mak defende feto faluk sira.
6 Maromak foo uma ba ema nebee mak la iha maluk;
Nia hasai ema dadur sira hodi foo moris diak ba sira,
maibee kontra door sira hela deit iha rai fuik maran.
7 Maromak, bainhira Ita Boot lao iha Ita Boot nia povu nia oin;
bainhira Ita Boot marxa liu husi rai fuik maran,
8 rai nakdoko, lalehan mos hatuun udan
tanba Sinai nia Maromak mai tiha ona;
Israel nia Maromak too tiha ona.
9 Maromak, Ita Boot hatuun udan boot mai
hodi halo Ita Boot nia rai nebee maran dekor sai matak fali ona.
10 Nunee Ita Boot nia povu hela metin iha nebaa;
Maromak, Ita Boot habosu tiha ona ema kbiit-laek sira tanba Ita Boot laran diak.
11 Nai Maromak hatuun Nia orden;
feto barak mos hatutan Nia liafuan dehan,
12 “Liurai sira ho militar sira halai hotu!”
Sasaan nebee tropas sira hadau, feto sira iha uma mak fahe ba malu.
13 Too ema nebee toba deit iha bibi luhan mos
simu manu pombu, nia liras taka ho osan mutin,
nia fulun osan mean nebee nabilan.
14 Maromak Kbiit Nain halo liurai sira namkari
hanesan neve nebee monu iha foho Zalmon leten.
15 Foho Basán, foho boot;
foho Basán, foho nebee iha tutun barak.
16 Foho tutun barak nee,
tansaa mak o laran moras
ba foho nebee Maromak hili atu sai Nia hela fatin?
NAI Maromak sei hela iha nebaa tinan ba tinan.
17 Maromak nia kuda kareta rihun ba rihun,
tokon ba tokon;
Nai Maromak mai tiha ona husi Sinai, tama iha fatin santu.
18 Bainhira Nia sae ba iha fatin aas,
Nia lori inimigu sira nebee Nia kaer iha funu laran;
Nia simu prezenti husi ema,
too ema kontra door sira mos foo prezenti.
Depois NAI Maromak hela iha nebaa.
19 Hahii Nai Maromak, ita nia Salvador;
loro-loron Nia lori ita nia naha.
20 Ita nia Maromak nee Maromak Salvador;
NAI Maromak Kbiit Nain hasai ita husi mate.
21 Tebes duni, Maromak sei baku rahun tiha Nia inimigu sira nia ulun;
ema sira nebee moris nafatin iha sala laran, Maromak sei halo rahun tiha sira nia ulun fatuk.
22 Nai hatete, “Hau sei lori inimigu sira mai husi rai Basán;
sira nebee iha tasi kidun mos, Hau sei lori hotu
23 atu o nia ain bele sama iha funu baluk sira nee nia raan,
no o nia asu sira mos lambe hotu.”
24 Maromak, ami haree Ita Boot nia prosisaun lao mai;
Hau nia Maromak, hau nia Liurai, Ita Boot nia prosisaun lao ba iha fatin santu.
25 Koru lao iha oin, tokador sira toka husi kotuk;
iha klaran feto klosan sira baku babadook.
26 Sira kanta, “Hahii Maromak iha ema lubuk boot nia leet;
Israel oan sira, hahii NAI Maromak ba.”
27 Haree ba, suku kiik Benjamim lao uluk iha prosisaun;
nai ulun Judá sira lao hamutuk;
nai ulun Zebulón ho nai ulun Naftali lao tuir.
28 Maromak, manda Ita Boot nia kbiit ba;
Maromak, hatudu Ita Boot nia forsa mai ami hanesan uluk Ita Boot hatudu tiha ona.
29 Bainhira Ita Boot sai mai husi Ita Boot nia uma kreda iha Jerusalém,
liurai sira lori oferta ba Ita Boot.
30 Siak tiha animal fuik sira nebee subar hela iha duut manulain nia laran;
hasee makaas karau aman forti sira nebee helik iha karau oan nia leet.
Sama hanehan tiha sira nebee mak duni tuir osan mutin;
duni lakon tiha nasaun sira nebee mak gosta funu.
31 Ema lori sasaan folin karun husi rai Ejitu;
rai Etiópia sei lolo liman ba Maromak.
32 Imi povu husi nasaun hotu-hotu, hananu ba Maromak;
hananu hahii Nai Maromak ba.
33 Nia sae kuda haleu kalohan antigu nian;
rona ba, Nia lian sai mai boot makaas hanesan rai tarutu.
34 Foo sai Maromak nia kbiit;
Nia ukun iha Israel;
Nia forsa iha kalohan laran.
35 Maromak nee makaas iha Nia fatin santu;
Israel nia Maromak foo forsa ho kbiit ba Nia povu.
Hahii Maromak!