69
Orasaun bainhira iha susar laran
Salmu David nian, tuir muzika “Ai funan liriu.” Ba dirijenti koru.
1 Maromak, salva hau,
tanba bee sae too tiha ona hau nia kakorok.
2 Hau mout iha tahu been naruk laran;
hau nia ain la sama metin ba rai.
Hau iha hela bee boot laran;
korenti makaas atu halo hau mout.
3 Hau halerik husu tulun too fraku ona;
hau nia kakorok sai maran tiha;
hau hein Maromak nia tulun
too hau nia matan sai kole tiha.
4 Ema odi hau maski hau la halo aat ba sira;
sira nee barak liu fali hau nia fuuk lahan.
Ema barak loos sai hau nia inimigu maski hau la halo sala hasoru sira;
sira hakarak atu halakon hau nia vida.
Sira eziji hau atu foo fali sira nia sasaan;
afinal hau nunka hadau buat ida husi sira.
5 Maromak, Ita Boot hatene hau nee ema beik ida;
Ita Boot haree mo-moos hau nia sala.
6 NAI, Nai Maromak Aswain,
keta husik ema nebee laran metin ba Ita Boot sai moe bainhira haree hau.
Israel nia Maromak,
keta husik ema nebee buka Ita Boot sai moe too oin tuun tanba hau.
7 Ema tarata hau tanba hau tuir Ita Boot;
sira hamoe hau aat loos.
8 Hau sai tiha ona ema fuik ba hau nia familia rasik;
hau sai ema leet ba hau nia maun-alin sira.
9 Hau foo aan tomak hodi defende Ita Boot nia uma, maski ida nee lori hau ba mate;
ema hatete aat Ita Boot, sira nia liafuan kona hotu hau.
10 Bainhira hau haraik aan ho jejun,
ema insulta fali hau;
11 bainhira hau tau hena lutu,
ema soe piadas mai hau.
12 Ema nebee tuur iha portaun sidade nian konta hau nia vida;
ema lanu-teen sira mos kanta kona ba hau.
13 Maibee NAI Maromak, hau harohan ba Ita Boot;
Maromak, iha tempu nebee Ita Boot desidi,
hataan hau hodi salva hau
tanba Ita Boot nia domin boot teb-tebes
no Ita Boot sempre halo buat nebee loos.
14 Hasai hau husi tahu laran;
keta husik hau mout.
Salva hau husi ema nebee mak odi hau;
dada sai hau husi bee naruk laran.
15 Keta husik mota boot halo mout hau
ka bee naruk tolan hau;
keta husik rai kuak naruk taka tiha hau.
16 NAI Maromak, hataan hau, tanba Ita Boot nia domin rohan-laek nee diak;
Ita Boot laran luak teb-tebes, see oin mai hau.
17 Keta subar Ita Boot nia oin ba Ita atan hau;
hau iha hela susar laran, hataan ho lalais ba.
18 Mai besik hau hodi foo liberdade mai hau;
salva hau husi hau nia inimigu sira.
19 Ita Boot hatene katak ema hatete aat hau,
ema hamoe hau no hafoer hau nia naran;
hau nia inimigu sira, Ita Boot hatene hotu.
20 Sira nia liafuan aat kona ba hau halo hau laran dodok
too hau lakon esperansa;
hau hein atu ema hanoin netik hau, maibee la iha;
hau hein atu ema foo korajen mai hau, maibee ida mos la mosu.
21 Sira kahur buat moruk ba hau nia hahaan;
bainhira hau hamrook, sira foo fali tua siin.
22 Hau harohan atu hahaan nebee prepara hela iha sira nia oin sai lasu ba sira;
husik sira nia selebrasaun sai fali rai kuak ba sira.
23 Husik sira nia matan sai delek atu sira la bele haree;
husik sira lori todan too sira nia kotuk bonko tinan ba tinan.
24 Fakar tiha Ita Boot nia hirus ba iha sira nia leten;
husik Ita Boot nia laran nakali kona sira ba.
25 Husik sira nia fatin sai fuik;
la iha ema ida hela tan iha sira nia tenda laran.
26 Tanba ema nebee mak Ita Boot baku, sira halo nia terus tan;
ema nebee Ita Boot hakanek, sira konta ba-mai kona ba nia terus.
27 Foo sai sira nia sala ida-ida;
la bele salva tan sira.
28 Hasai tiha sira nia naran husi lista ema moris nian;
keta husik sira nia naran hakerek hamutuk ho ema nebee mak moris loos.
29 Maibee hau nee terus ho laran susar;
Maromak, foo Ita Boot nia salvasaun hodi hamahon hau.
30 Depois hau sei kanta hodi hahii Maromak;
hau sei agradese hodi foti aas Nia naran.
31 Ida nee sei halo haksolok NAI Maromak nia laran liu fali oferta karau aman,
liu fali sakrifisiu karau aman dikur naruk.
32 Bainhira ema mukit haree hau hahii Maromak, sira sei kontenti;
imi nebee adora Maromak, laran metin fali ba.
33 Tanba NAI Maromak rona ema nebee kiak;
Nia la fila kotuk ba Nia ema sira nebee mak iha dadur laran.
34 Lalehan ho rai, hahii Nia ba;
tasi ho buat hotu nebee moris iha laran, hahii Nia ba!
35 Tanba Maromak sei salva Siaun;
Nia sei harii fali sidade sira nebee mak iha rai Judá,
depois Nia povu sei hela iha nebaa
hodi sai nain ba rai.
36 Too Nia atan sira nia jerasaun mos sei sai nain nafatin ba rai nee;
ema nebee hadomi Nia naran sei hela iha nebaa.