2
Godón Samuan Tótók
Pentakost* Tóre ngürr nóma semrranórr, Yesun amkoman angun pamkolpama blaman kwób bazerrón koralórr darrpan pokodó.+ Büzyón babul, wirri arüng wóran ukwóma tamórr kwitümgabi, wamaka wirri ngürsili busoda. Ene ukwóma müót blaman murrausürr, i ne bobrralórr. Abün ur ulitzan klama ibüka ugón okaka tübinóp. Da ma olgabi bürrgrrütóp, ama darrpan-darrpan kolpamab singüldü bamelórr. Ibü blaman büb Godón Samua gwarrarrón kwarilürr. I ngibürr umul-kók bóktane bóktanóm ugón bainóp, Godón Samua enezan umul nyónónóp.
Ene tonarrdó, Zerrusalem wirri basirrdü Godón moboküpi amkoman angun Zu kolpama ngyaben kwarilürr. I blaman bwóbdügabi togobórr ini tüpdü. I nóma barrkrrurr wórzan ukwóm, blamana togobórr kókó darrpan pokodó. Blamana gübarirr aengóp, akó blaman umul-kók kwarilürr laróga tómbapón yarilürr, zitülkus Yesun amkoman angun kolpama ibü bóktane bóktan kwarilürr. Ibü ilküküpa tübausóp, da tibiób bamtin kwarilürr wagó, “Iba! Nurrkrruam! Ini nidi bóktandako, i go wa blaman tib Galili pamkolpamako, a mi ibü iade arrkrrudakla mibióban bóktane bóktande? Mi abün-abün bwóbdügabi togobórró: Parrtia, Midia, Elem, Mesopotamia, Zudia, Kapadosia, Pontus, Eisia, 10 Prrigia, Pampilia, Izipt, akó Libia, Sirrin wirri basirr minggüpanan. Mi ngibürr Rrom§ kolpamakla, nidi togobórró bupso ngyabenóm, 11 nizan Zu akó nidi dabinóp [Zu pamkolpamab⌋ Godódó, akó mi ngibürr Krrit akó Arrabia pamkolpamakla. Mi ibü arrkrrudakla mibióban bóktane bóktande, God ne wirri tórrmen-tulmil tómbapónórr.” 12 I gübarirr aengóp akó wirri müp gyagüpitótók ipüdóp, da tibiób bamtinónóp wagó, “Ia ini küp laróga?”
13 Ngibürr kolpama Yesun amkoman angun pamkolpam ⌊tiz bangón⌋ kwarilürr wagó, “I go küsil misan waen karibóka-koke enórre.”
Pitan Bóktan Pamkolpamab Ngorodó
14 Da Pita zamngólórr tóba 11 kamdalpükü, da pamkolpamdó barrkyananbóka bóktanórr wagó, “Kürü Zu pam, akó blaman nidi ngyabendakla Zerrusalemóm, e kürü bóktan tai tübarrkrru ka ne poko bóktono akó müsirrga ino. 15 Ki ngyepame gorrgorr kokeakla, ezan gyagüpi tótókdakla. Ini wata irrbia, abüs küp 9 ngarkwata. 16 A Zo-el, darrü ⌊prropet⌋, ngaen ne poko pupainürr tóba pebadó, errkya tómbapónda. Wa wialómórr wagó,
17 “ ‘God igó bóktanda wagó, “Dómdóm ngürrdü,
ka kólba Samu sab sekono blaman pamkolpamdó.
Yabü simanal olmal akó ópal olmala sab kürü ngidü bóktan kwarile;
küsil pama sab nuszan kla nósenórre aerrde;
myangala sab nus bazurrule.
18 Kürü ⌊leba zaget⌋ pam akó kol,
ka ta ibüka kólba Samu sab sekono,
da i kürü ngidü bóktan kwarile.
19 Ka sab ⌊asen-koke tórrmen⌋ okaka izazilo kwitüm,
akó ka sab ⌊wirri tulmil⌋ okaka izazilo tüpdü: óe, ur, akó wirri güm nokam.
20 Kwitüdü abüsa sab tümün baine
akó melpala sab óe-óe baine.
Lodón amkoman wirrian Ngürra sab ene solkwat tame.
21 Sab inzan yarile, blamana Lodón ngi nidi ngiliandako ibü tangbamtinüm, ibü sab zid nirre.” ’+
22 “Kürü Isrrael pam, e tübarrkrru kürü ini bóktan: Yesu, Nazarret olom, God oya amkoman yónürr yabü obzek kwata, wa ne ⌊arüng tonarr], asen-koke tórrmen, akó wirri tulmil tómbapón yarilürr oyakama, e blamana enezan umulakla. 23 Yesun yabü tangdó singrinóp, Godón angrirrün bóktan ngarkwatódó, akó oya ngaerrón umulürründügab. Da e toto-e azitarre nugupdü akó emkólarre, Mosesón gida mamoan-koke pamab tange.+ 24 God büdülan arüng emkalórr, da Yesun irsümülürr büdüldügab, zitülkus büdülan arüng gaodó koke yarilürr oya amoanóm.+ 25 ⌊Deibid⌋ oyakwata bóktanórr wagó,
“ ‘Ka Lodón* asendóla kürü obzek kwata blaman tonarrdó;
zitülkus wa kürü tutul tangdóma, kürü darrü pama koke kunue.
26 Ene zitülkusdü, kürü moboküpdü kari barnginwóm ta kokea,
akó kürü ulitüdügab morroal bagürwóm bóktana bausdako.
Ka ⌊gedlóngóm baindóla⌋ God ne morroal elklaza tómbapónóm kainda kürüka.
27 Zitülkus módóga, God, ma sab kürü büdülab bwóbdü koke kolkomolo,
akó ma koke ok ino moba Gyabi Oloma abünüm gapókdó.
28 Ma kürü kuri umul kyórrü morroal ngyaben kwat,
akó marü bagürwóm sab asi yarile kürüka, zitülkus ma kürü ngyabendó asi namulo.’+
29 “Kürü Isrrael zonaretal, ka yabüka tai igó müsirrga yónün, mibü wirri abbobat Deibidünkwata. Deibid tóbabóka koke apón yarilürr, zitülkus wa tüób amkoman nurrótókórr, gapókdó we ingrinóp. Oya gapók asine aini errkya minkü. 30 A wa prropet yarilürr, akó wa umul yarilürr, God oya ne arüng ⌊alkamül-koke⌋ bóktan iliónürr wagó, ‘Marü darrü bobat, ka oya sab king ngi ekyeno, mazan namülnürrü, pamkolpam balngomólóm.’+ 31 Deibid ngaen esenórr, God ne kla tómbapónórr solkwat, da wa bóktanórr ene ⌊Kerrison⌋ arsümülankwata wagó, God oya sab koke elkomóle büdülab bwóbdü akó oya büba sab koke abüne gapókdó. 32 God arróldó irsümülürr ini Yesun; ki blamana esenóp ilküpi. 33 God oya Aba oya kwit igasilürr tóba tutul tangdó mórranóm, akó wa oya tóba Samu ekyanórr, tóba alkamül-koke bóktan ngarkwatódó. Yesu Godón Samu sekanórr kibüka, e errkya ne kla asendakla akó arrkrrudakla. 34 Zitülkus Deibid tüób koke kasilürr kwitüm, a wa ma bóktanórr wagó,
“ ‘Lod God igó bóktanórr kürü Lodódó§ wagó,
“Ma ae mórra kürü tutul tangdó,
35 kókó marüka bóka bamgün nidipko, ka sab ibü inzan ninünümo, marü wapór nisab ngón ngagón klamóm.” ’ ”*+
36 Pita tóba bóktan we elakónórr wagó, “Ini pokodó, blaman Isrrael pamkolpam wata amkoman umul ki kwarilün wagó, ini Yesu, e noan krrosdó emkólarre, God oya wirri ngi ekyanórr wagó, Lod akó Kerriso, tóba pamkolpam balngomólóm akó zid bainüm.”
37 Pamkolpama nóma barrkrrurr Pitan blaman bóktan, kari müp gyagüpitótók koke ipüdóp da bóktónóp, Pita akó ngibürr ⌊apostoldó⌋ wagó, “Zonaretal, ki ia kairre?”
38 Pita ibüka bóktan yalkomólórr wagó, “E blaman darrpan-darrpana Godka tübyalüngam yabiób kolae tonarrdógabi, da yabü ⌊baptaes ki ninünüm⌋ Yesu Kerrison ngidü. Igósüm yabü kolae tonarr, God sab norrgorre akó yabü sab tóba Samu nókyerre, Godón morroal ⌊gyaur kla⌋. 39 Zitülkus módóga, Lod mibü God tóba alkamül-koke bóktan tóba Samuankwata yabü tókyenóp, akó yabü olmal akó aibwób nidipasko, wa nibiób ngibaunda tóbaka.”
40 Pita ibü abün umul-umulan bóktan we nülinóp akó ibü arüngi nilóp wagó, “Yabiób zid bainam, da Godka tübyalüngam ini kolae lüólan pamkolpamdógab.” 41 Abün pamkolpama amkoman yangunóp Pitan bóktan, da ibü baptaes ninóp. Yesun amkoman nidi yangunóp, blaman kókó 3,000 kolpama dabinóp ene ngürr. 42 I blaman tonarr wata darrpan pokodó kwób bazen kwarilürr, Yesunkwata bóktan umul bainüm apostoldógab, tibiób arüng bütanóm, Lodón gyagüpi amanik alo alom, akó tóre bakom.
Yesun Amkoman Angun Pamkolpamab Ngyaben
43 Apostola abün asen-koke tórrmen akó wirri tulmil tómbapón kwarilürr, Godón arüng pupainüm, da pamkolpama igósidi Godón gum-gum ⌊ótók⌋ kwarilürr. 44 Blaman Yesun amkoman angun pamkolpama wata darrpan moboküpi ngyabenónóp, da i abün mün kwób bazelórr darrpan pokodó. I tibiób elklaza morroal gyabalóm kwarilürr.+ 45 I tibiób tüp akó elklaza sel bain kwarilürr, ene mani we gyabalómnóp tibiób darrpan-darrpan, mani babulan nibiób koralórr. 46 Blaman ngürrzan i kwób bazen kwarilürr ⌊Godón Gyabi Müótüdü⌋ darrpan pokodó. I Lodón gyagüpi amanik alo alo kwarilürr, akó popa alongalo kwarilürr müót-müót barnginwómpükü, akó amkoman moboküpi gyabalóm kwarilürr. 47 I Godón metat agür ó wórr angyal kwarilürr, da pamkolpama ubi bainónóp ibü ngyabendó. Blaman ngürrzan, Lod wa kolpam yazeblórr inkü dabyónüm, wa ne pamkolpam zidbain yarilürr.
* 2:1 Pentakost Grrik bóktan opora. Oya küp módóga: 50 ngim ngürr. Ene 50 ngim ngürr yarilürr, ⌊Büdül Kórzyón Tóre⌋ akó ⌊Ist-koke Brred Tóre⌋, ibü kakóm, Yesu ne ngürrdü nurrótókórr. Pentakost tóre ngürrdü, Zu pamkolpamab ⌊wit⌋ abül tóre asi yarilürr. + 2:1 Lebitikus 23:15-21; Duterronomi 16:9-11 2:4 umul-kók bóktan, Mórrke-mórrke módóga: tongues. Oya küp nisamli: Mogob pamkolpamab bóktan ó igó bóktan ngibürr pamkolpam gaodó kokeako küp umulüm, Godón Samua ne bóktan akyanda. 2:9 Ene tonarrdó, Eisia darrü prrobins yarilürr, Rrom kinga ne bwób alngomól yarilürr. Errkya ene poko Tórrki kantrridü pokoa, Eisia Maenorr kugupidü. § 2:10 Rrom wirri basirr, Itali kantrri kugupidümase, Yurrop kugupidüma. + 2:21 Zo-el 2:28-32 + 2:23 Metyu 27:35; Mak 15:24; Luk 23:33; Zon 19:18 + 2:24 Metyu 28:5-6; Mak 16:6; Luk 24:5 * 2:25 Lod: Deibid Yesun bóktan wialómórr. Lod Godónbóka apónda. 2:27 Gyabi Olom wa ⌊Mesayabóka⌋ apónda. + 2:28 Wórr Peba 16:8-11 + 2:30 2 Samuel 7:12-13; Wórr Peba 132:11 2:33 tutul tangdó mórranóm, oya küp módóga: wirri pabo ipadórr. § 2:34 kürü Lod wa ⌊Mesayabóka⌋ apónda. * 2:35 Ini bóktanan küp módóga: marüka bóka bamgün is nidipko ka sab blaman ⌊ut-ut ninünümo⌋ marünkü. + 2:35 Wórr Peba 110:1; Bwób Zitül 3:15 + 2:44 Apostolab Tórrmen 4:32-35