12
Judit i mekim gutpela pasin
1 Holofernes i tokim ol wokman long bringim Judit i go insait long rum kaikai we ol i bin lainim ol plet silva. Na em i tokim ol long givim Judit ol gutpela kaikai na wain em yet i save kisim.
2 Tasol Judit i tok, “Mi no inap long kaikai ol dispela kain samting. Nogut mi brukim tambu na mekim rong. Mi bai kaikai ol samting mi yet mi bringim pinis. Em bai inap long mi.”
3 Na Holofernes i tokim em, “Sapos ol kaikai bilong yu i pinis, olsem wanem bai mipela i painim sampela moa? I no gat wanpela Juda i stap wantaim mipela.”
4 Na Judit i bekim tok bilong em olsem, “Tru antap, mi ken tokim yu stret. Taim Bikpela i pinisim olgeta samting em i laik mekim long han bilong mi, ol kaikai bilong mi bai i no pinis yet.”
5 Orait ol wokman bilong Holofernes i bringim Judit i go insait long wanpela haus sel, na em i go slip inap long biknait tru. Klostu tulait, taim ol soldia i was long nait i was i stap yet, Judit i kirap
6 na em i salim tok i go long Holofernes olsem, “Mi laik kisim tok orait long yu bai mi ken go ausait long ples daun na mekim prea.”
7 Olsem na Holofernes i tokim ol soldia i was i stap bai ol i no ken pasim em. Judit i stap long kem inap long 3-pela de, na olgeta nait em i go ausait long ples daun klostu long Betulia, na em i waswas long hul wara.
8 Waswas pinis, em i save prea long God, Bikpela bilong Israel, long soim rot long em bilong helpim ol Israel i win.
9 Em i save bihainim pasin bilong kamap klin long ai bilong God na bihain em i save go bek na i stap long haus sel inap long taim bilong kaikai long apinun tru.
Bikpela pati bilong Holofernes
10 Long de namba 4 Holofernes i mekim wanpela bikpela kaikai bilong ol wokman i save lukautim haus bilong em. Tasol em i no singautim ol ofisa bilong ami i kam.
11 Na Holofernes i tok olsem long Bagoas, em man i bosim olgeta samting bilong em, “Yu go na grisim dispela meri Hibru yu save lukautim, bai em i kam kaikai na dring wantaim mipela long haus sel bilong mi.
12 Sapos mipela i larim kain meri olsem i go nating na mipela i no gris wantaim em, na mipela i no slip wantaim em, em bai i lap long mipela.”
13 Orait Bagoas i lusim Holofernes na em i go lukim Judit. Em i tok olsem, “Naispela meri, inap yu kam pati wantaim bikman bilong mi? Em i laik bai yu dring wain na amamas wantaim mipela. Yu kam tasol na mekim wankain pasin olsem ol meri bilong Asiria i save mekim taim ol i stap long haus bilong Nebukatnesar.”
14 Na Judit i bekim tok olsem, “Mi husat na bai mi inap tok nogat long bikman bilong mi? Mi amamas tru long kam na mekim olgeta samting em i laikim, na mi save, bai mi no inap lus tingting long dispela nait inap mi dai.”
15 Olsem na Judit i kirap, na em i putim ol naispela klos na olgeta bilas bilong em. Wokmeri bilong en i go pas na long graun klostu long Holofernes, em i putim ol skin bilong sipsip. Bagoas i bin givim ol dispela skin bilong sipsip long Judit bai em i ken sindaun long en long taim bilong kaikai.
16 Orait Judit i kam insait na em i sindaun. Na bel bilong Holofernes i kirap tru long em na em i skrap moa yet long slip wantaim em. Olgeta taim em i bin lukim em i kam inap nau, em i wari tasol na i wet long painim wanpela taim bilong prenim em.
17 Olsem na Holofernes i tokim Judit olsem, “Kaman. Yu dring nau na yu amamas wantaim mipela.”
18 Na Judit i bekim tok, “Yes, bikman, bai mi dring wantaim yu. Long wanem, dispela em i bikpela de tru long laip bilong mi.”
19 Orait Judit i kaikai na i dring long olgeta samting wokmeri i bin redim pinis.
20 Na Holofernes i lus tru long lukluk long em, na em i dringim planti wain moa. I no gat wanpela taim bipo em i bin spak inap olsem em i spak nau.