1 Sapos + yu laik mekim gut long ol manmeri, orait skelim gut ol dispela manmeri yu laik helpim. Olsem na bai yu kisim tenkyu long ol gutpela wok bilong yu. 2 Sapos yu mekim gut long ol stretpela manmeri, orait bai ol yet i bekim pe long yu. Sapos nogat, Bikpela Antap Tru bai i givim pe long yu. 3 I no gat wanpela gutpela samting bai i kamap long ol manmeri i pas long ol samting nogut, na long ol manmeri i no save helpim ol rabisman. 4 Mekim gut long ol stretpela manmeri, tasol yu no ken helpim ol manmeri i save mekim sin. 5 Yu mas mekim gut long ol manmeri i no gat nem. Yu no ken givim samting long ol manmeri nogut, na yu no ken givim nating kaikai long ol. Mobeta yu pasim kaikai i stap, nogut ol i painim rot bilong bagarapim yu nau. Long wanem, bai ol i bekim pe nogut tru long yu, maski yu bin mekim ol gutpela pasin long ol. 6 Bikpela Antap Tru i save bel nogut long ol manmeri bilong mekim sin, na bai em i mekim save tru long ol. 7 Mekim gut long ol stretpela manmeri, tasol yu no ken helpim ol manmeri i save mekim sin.

8 Long gutpela taim, yu no inap save husat i pren tru bilong yu. Tasol long taim nogut, ol birua bilong yu i no save hait. 9 Long taim ol samting bilong yu i stap gut, ol birua i save bel hevi. Na long taim ol samting bilong yu i bagarap, ol pren tu bai i lusim yu. 10 Yu no ken bilipim birua bilong yu. Nogat tru. Long wanem, bai em i bagarapim yu olsem ros i bagarapim kapa. 11 Maski em i daunim em yet na em i grisim yu, yu mas lukaut na was gut long ol dispela kain manmeri. Wok hat long skelim pasin bilong ol, olsem man i save wok hat long klinim glas bilong lukluk, tasol em i painim hap pipia i stap yet. 12 Yu no ken mekim ol i sindaun klostu long yu. Nogut ol i rausim yu na i kisim ples bilong yu. Yu no ken larim ol i sindaun long han sut bilong yu, na nogut ol i pulim wok bilong yu. Na tru tumas, bihain bai yu painimaut olsem, mi bin tok tru. Na tok mi bin autim bai i sutim tru bel bilong yu. 13 Sapos ol manmeri i save lukautim ol snek, na snek i kaikaim ol, husat bai i sori long ol? Na ol manmeri i go klostu long ol wel abus, husat bai i sori long ol? 14 Olsem tasol, ol bai i no inap marimari long wanpela man o meri i save poromanim ol manmeri bilong mekim sin, na i go insait tru long ol wok nogut bilong ol.

15 Liklik taim tasol bai ol i stap wantaim yu, tasol sapos yu laik bihainim narapela rot, bai ol i lusim yu. 16 Tok gris bai i pulap long maus bilong birua, tasol long bel bilong em, em i tingting long tromoim yu i go daun long hul. Ai bilong birua bai i krai, tasol em bai i wet long painim rot bilong dringim blut bilong yu. 17 Sapos trabel i bungim yu, birua i sambai pinis i stap, na em bai i giaman long helpim yu. Tasol em bai i kikim lek bilong yu na bai yu pundaun. 18 Em bai i kamap narakain man olgeta. Bai em i tanim het bilong em na paitim han na mekim planti tok baksait long yu.*