14
Ol manmeri i no bin mekim liklik asua long toktok bilong ol, ol i ken amamas. Ol i no ken sori long ol sin bilong na pilim bel hevi long en. Tru tumas, ol dispela kain manmeri i ken amamas, sapos bel bilong ol i no kotim ol long wanpela sin ol i bin mekim, na ol i no ken les long wetim ol gutpela samting i laik kamap.
Rot bilong lukautim ol mani samting
Planti mani i no gutpela samting, sapos ol manmeri i save haitim na pasim ol samting bilong ol. Bai mani i helpim ol dispela kain manmeri olsem wanem? Sapos ol manmeri i pasim mani bilong ol, na ol i no laik baim kaikai, ol i pasim nating. Long wanem, bihain ol arapela manmeri bai i kisim na amamas long en. Man i no mekim gutpela pasin long em yet, em bai i mekim gutpela pasin long husat? Em i no inap amamas liklik long ol gutpela samting bilong ol. Ol manmeri i no save lukautim skin bilong ol yet, bai ol i bagarap olgeta. Dispela em i pe bilong pasin nogut bilong ol. Sapos ol i mekim gut long ol arapela manmeri, ating ol i lusim tingting na ol i mekim. Bihain tru, pasin nogut bilong ol bai i kamap ples klia. Ol manmeri i rong tru, sapos ol i pasim ai, na ol i no laik givim samting long ol arapela manmeri. Na em i rong, sapos ol i tanim het na i givim baksait long ol tarangu. Ol dispela kain manmeri i no amamas long kisim liklik samting. Pasin mangal bilong ol bai i mekim ol i wari tasol. 10 Ol manmeri olsem, ol i no save laik long baim bret, olsem na haus bilong ol i no gat kaikai.
11 Pikinini, sapos yu inap, orait yu mas lukautim gut yu yet. Na bringim ol ofa Bikpela i save laikim tumas. 12 Dai i no save surikim taim bilong en. Na yu no save, ol i bin makim wanem de bilong yu i go long ples bilong ol man i dai pinis. 13 Taim yu stap yet, mekim gut long pren bilong yu. Na sapos yu inap, orait givim planti presen long em. 14 Sapos de bilong singsing i kamap, orait yu no ken lusim. Na taim gutpela kaikai i stap, yu no ken tok maski. 15 Ating yu laik givim pe yu save kisim long wok bilong yu i go long ol arapela manmeri? Na ol i ken pilai laki long samting i kamap long hatwok bilong yu? 16 Givim ol samting bilong yu long ol arapela manmeri. Tasol yu yet yu mas holim sampela samting bai yu ken amamas long en. Long wanem, long ples bilong ol man i dai pinis, yu bai i no inap painim amamas. 17 Laplap i save kamap olpela, na olsem tasol olgeta manmeri i save go lapun. Long wanem, lo bilong bipo tru i tok olsem, ol manmeri i mas i dai. 18 Tru tumas, laip bilong ol manmeri i olsem. Ol olpela lain i save dai, na ol nupela lain i kamap. Em i olsem lip bilong bikpela diwai. Sampela i pundaun, na sampela i kamap nupela gen. 19 Olgeta samting ol manmeri i wokim i save bagarap na bai i pinis olgeta. Na ol manmeri tu bai i dai wantaim ol wok bilong ol.
Ol manmeri i mas lukaut gut long pasin bilong ol,
nogut ol i mekim God i belhat long ol
(Sapta 14.20—23.27)
Ol manmeri i gat gutpela tingting ol i ken amamas
20 Ol + manmeri i wok long painim pasin bilong gutpela tingting na i save autim gutpela toktok, ol i ken amamas. 21 Tru tumas, sapos ol dispela manmeri i traim long save gut long ol rot bilong gutpela tingting, ol bai i painimaut as bilong en na bai ol i amamas. 22 Bihainim gutpela tingting olsem ol manmeri i painim abus. Na hait na was i stap long ol rot bilong em. 23 Lukluk insait long ol windo bilong em, na putim yau long ol dua bilong em. 24 Sindaun malolo klostu long haus bilong em. Sanapim ol pos, na pasim long banis bilong haus bilong em, 25 na putim sel, na bai yu gat ples bilong sindaun gut. 26 Wokim kem aninit long diwai i gat ol bikpela han, bai ol han i ken karamapim ol pikinini bilong yu, 27 na haitim ol long tuhat bilong san. Na bai yu sindaun gut wantaim strong bilong gutpela tingting.
+ 14:20 Snd 8.32-35