10
Tobit na Ana i wari i stap
1 Long taim Tobaias i no kam bek yet, Tobit i wok long kaunim ol de bilong wokabaut bilong Tobaias i go long Rages na i kam bek. Na long tingting bilong em, ol de bilong wokabaut i mas pinis, tasol pikinini bilong en i no kam bek yet. Olsem na Tobit i tokim meri bilong em olsem,
2 “Ating wanpela samting i pasim pikinini bilong mitupela na em i no kam bek hariap. Nogut Gabael i dai pinis, na i no gat man inap givim dispela mani long Tobaias.”
3 Na bel bilong Tobit i pas tru.
4 Na Ana i kirap na i tok olsem, “Pikinini bilong mi i dai. Mi save pinis.” Na em i stat long krai sori long Tobaias na i tok,
5 “O pikinini bilong mi, yu lewa bilong laip bilong mi. Bilong wanem mi larim yu i go?”
6 Tasol Tobit i tokim em olsem, “Maski, yu no ken krai. Tobaias i stap orait. Ating wanpela samting i bin kamap na i pasim tupela. Yu save, poroman bilong en em i wanpisin bilong yumi, na em i stretpela na strongpela man. Maski, yu no ken kirap nogut na wari tumas. Mi pilim olsem, Tobaias em i wok long kam bek nau.”
7 Tasol meri i bekim tok olsem, “Maski, yu sanap na yu larim mi i krai i stap. Yu no ken trikim mi. Pikinini bilong mi i dai pinis.” Na long olgeta de long moningtaim yet Ana i lusim haus na i go sanap long dispela rot Tobaias i bin wokabaut i go long en. Na em i wet wet inap long taim san i go daun. Em i no save kaikai. Na long apinun em i kam bek, na em i krai krai long pikinini bilong em, i go inap long moningtaim gen. Em i no save slip liklik. Nogat.
Tobaias na Rafael i lusim taun Ekbatana
8 Raguel i bin promisim pikinini bilong em Sara long em bai i wokim bikpela pati bilong marit, na dispela pati i winim 2 wik pinis nau. Olsem na Tobaias i go long Raguel na i askim em olsem, “Plis, inap long yu orait long mi ken i go bek long ples bilong mi? Mi save pinis, papa na mama bilong mi, tupela i wari na i ting, tupela i no inap long lukim mi gen. Plis, Raguel, larim mi i go bek long papa bilong mi. Mi tokim yu pinis, taim mi lusim em, em i lapun pinis na ai bilong en i pas.” Tasol Raguel i bekim tok olsem, “Pikinini, yu mas i stap yet wantaim mi. Na mi yet bai mi salim ol man i go long papa bilong yu, na ol i ken tokim em olsem yu stap i orait.”
9 Tasol Tobaias i tok strong olsem, “Nogat. Mi no ken. Plis, yu mas larim mi i go bek long papa bilong mi.”
10 Orait Raguel i no wet moa na em i givim Sara long Tobaias. Na em i givim Tobaias hap bilong olgeta samting bilong em. Em i givim em ol wokman na wokmeri nating na ol bulmakau na sipsip na donki na kamel na ol bilas na mani.
11 Raguel i givim kis long Tobaias na em i givim gutpela tok long em olsem, “Gutbai, pikinini bilong mi. Wokabaut gut. God bilong heven i ken was long yu wantaim Sara. Na mi laik bai mi yet mi ken lukim ol pikinini bilong yutupela.”
12 Na Raguel i tokim Sara olsem, ‘Yu go wantaim man bilong yu, na yu mas i stap long haus bilong papamama bilong em. Na tupela i mas i stap papamama bilong yu, wankain olsem mitupela i stap papamama bilong yu i kam inap nau. Mi laik harim tupela i mekim gutpela tok long yu long olgeta de, inap long taim mi dai.” Em i tok gutbai pinis, orait em i salim tupela i go.
Na Etna i tokim Tobaias olsem, “Tobaias, yu gutpela pikinini bilong mi. Bikpela i ken bringim yu i go bek orait long ples bilong yu. Na Bikpela i ken mekim gut long mi tu, bai mi ken i stap inap long de mi lukim ol pikinini bilong yu. Bikpela i ken harim tok bilong mi. Mi givim pikinini bilong mi i go long yu bai yu lukautim em. Plis, i no gat wanpela taim long laip bilong yu, yu ken mekim wanpela samting inap long mekim bel bilong en i nogut. Nau yutupela i ken wokabaut gut. Nau Sara em i meri bilong yu, na mi mama bilong yu. Mi prea bai yumi olgeta i ken i stap gut na amamas tru long olgeta de bilong laip bilong yumi.” Na Etna i givim kis long tupela na em i salim tupela i go.