2
Uritosu adama a̱ a̱ga̱nda̱
Ili yu ufaru, n ciga ta̱ n damma wu vu yuwaan za suru avasa. Nna̱ vaa yuwan ipati ya̱ wu, vu pati A̱sula̱ u roco le isaꞌani ya̱ yi, reve vu damma A̱sula̱ vu godyo ta̱. Tsu yuwayin ngono na aza a na a̱ ri na̱ tsugbain suru avasa tsunda. Tsu yuwain ne adama tsu yuwain nden n saꞌani no okolo nden. Vu yuwan ne adama tsu yuwain cuꞌun vu nden n na A̱sula̱ a cigai, waru tsu ta yuwan nden n saꞌani na ama. Mayan ma avasa tsunda u tu ulobonu, waru tsu to yoꞌonoto A̱sula̱ okolo nna̱ tsu yuwan ne. A̱sula̱ a ɗa za na tsu wawa tsu, waru u ciga ta̱ u wawa ama suru. Waru u ciga ta̱ ama suru e reve ili i na i ri amayun. A̱sula̱ a̱ ta̱ a ɗa. Waru vuma ta̱ ta̱ lo na tsu uwa e memere ma̱ A̱sula̱ na ama. Vuma ta̱ ndolo a̱yi ɗa Zamawawa Yesu goon. Yesu Zamawawa ɗa goon za na tsulayi koyan ɗa ufa̱lu, ana u cayi aciya̱yi reve o una yi. A̱sula̱ a ca ta̱ ikaka i nda a̱ tyo o uvaɗi a mantsa ma saꞌani ma na u ɗangwai.* N damma ɗu ta̱ mejege suru suru, ana n damma nɗu A̱sula̱ a ɗangwa mu ta̱ mo oꞌwo aajiya na̱ za va alajiya. Ulinga u va̱ a̱yi ɗa n rito Atakpaci ucawu wo okolo wa amayun.
A mantsa ma na i ɓolotoi biti adama i yuwaan A̱sula̱ a̱ga̱nda̱ n ciga ta̱ ali a̱ ꞌya̱sa̱n ekere e le zuva, nna a yuwusan avasa, waru n ciga ta̱ ekere o ndolo a̱ da̱na̱ cece. She a̱ tsura̱ upan ko mawasan a̱tsuma̱ a aza a na aa yuwusan avasa wan.
9-10 Waru n ciga ta̱ a̱ma̱ci o oto itana i na yi ntsayi a̱ma̱ci a amayun o oto. O oto itana ulobonu, waru o oto itana i na yaa varu ama wan. O tsu roco ta̱ ulobonu u le a̱tsuma̱ e ili i na aa yuwusan. Maɗava me le ma ɗa mo tso roco ulobonu u le ko iliyatsuvu i zinariya i na oo oto ɗa shi. Waru iyeɗi yi ikebe† i le i ɗa yoo rocosu ulobonu u le shi. A suma ili i ndolo suru.
11 A̱ma̱ci o polo atsuvu reve waru o rito ben na a yuwin tsutoni. 12 N lyawa a̱ma̱ci o rito ali shi, waru n lyawa le a̱ tsura̱ tsugbain a aci a ali shi. Amma a̱ma̱ci o polo atsuvu ulobonu. 13 Ili i na i ta̱wa̱i na̱ ne a̱yi ɗa Ada̱mu ɗa A̱sula̱ a fara yuwain, reve u kuru na̱ Hawa.† 14 Reve waru Mekerenkesu ma̱ pusa̱a̱n ka ugbozu, ɗaɗa unusu wee teme. Mekerenkesu ma̱ pusa̱a̱n Ada̱mu† ugbozu shi. 15 Adama o ndolo, A̱sula̱ a ta wawa a̱ma̱ci ana aa matsasan muwun, agba waru a̱ da̱na̱ nu ucawu wo okolo. A ꞌyuwan a ciga a yuwan icigi waru a yuwan wuma u na A̱sula̱ a cigai. A yuwan nden n wuma u mejege.
* 2:6 Ure u ro u na aa damma urevu wa̱ yi uba̱ta̱ u nda a̱yi ɗa: Ukwa̱ wa̱ Yesu tsa̱ kucci urotsu u ɗa u na woo rocosu A̱sula̱ a ciga ta̱ a wawa ama. Urotsu u ndolo u ta̱wa̱ ta̱ a mantsa ma na wu ntsayi. 2:9-10 A̱yi danshi Tsuheleni “iyeɗi yi ikebe” u ta yuwusan adanshi a muwara, cuꞌun muwara n na a̱ tsu tsura̱ a̱tsuma̱ e inama i mala (Mat. 7:1).