5
1 Ot tasagob atonio guwi amonai tamama—ot usit tafanamai—singogoros on—God arimon safamai nan ati goa inboweinet nan tanama, goa min On Toun ibiyamai on, on goa on arimon inen au wantoan au wantoan.
2 Ari atonio tafanamai goai tamama on tabisuweigan, ato tagogoi bag on ati goa safam emon i’nat on beber ba intaragabuet;
3 on beber ba itiwanit on men arimon kereremotit tatama on.
4 Ot nin tafanam an goai tamama on, ot usibaban an bit taboai tabisuweigan tabikakafun, ato ot on men on nanaba tagogoi tafanam an usit on tanreben on, ambin, baise ot tagogoi on safam an goa on usiti taniwanit, onai ot usit inarab on inikitabirai yawas boboun bag inboai.
5 God On Toun on atonio goa baikitabir aurin on ibotitiwagit ato On an Ayu on sawar ainauin bag on itet nan sintubaren sinen weinet.
6 On mes ot on ra fufur ati not on men efefeu on. Ot tasagob ati goa usiti sen on, ot Bada an goa emon mabiti tanama.
7 Yabin ot ati yawas on tabitutum on nan tamama, men matati taiten on nan tamama on.
8 Ot ati not ebitutufin ato tagogoi bag ati goa on tanikirir tanan Bada an goa on nan mat tanama.
9 On mes ot on mamaba nin ati goai tamama o goa tani mabinai nan tamama, baise ot ati gogoi gagamin bag on God taniyasisirai.
10 Yabin ot sabu engon tutufin on arimon Keriso nanai tantawar ati yawas mamaba tafofour on inigurubabanit. Ot sabu kakaita kakaita nin tafanamai tamama ati yawasai bobo obis tafofour o bobo komasis tafofour aurin on ot sabu kakaita kakaita ati boboai on nanaba ati baiyan tanboai.
Kerisoai on God Mat Tanituran
11 Ot tasagob on yabin aibo mes on Bada tanberuai, on mes ot tafofourtobon sabu nunuas tanboai. God on isagobit tiwag, ato abitutum omi nunuamui mat on dura bag yau wosagobiu tiwag.
12 Wei on men wafofourtobon toui auri on omi aurim wanidura bag men on; baise wei wafofourtobon wei auri on wankasonem wonsagob, ato omi wei auri on wontaseseir, onai wonsagob ato sabu woniyafotes osi iyabon usis koun an itinai wat seites sebogaiis on, a osi on men orot jever nunuan amonai aurin sebinonotai on.
13 Ato sabu sau wei on wabikokok, baise on on God an baiduduranin aurin. Ato wei ai not ebobo tiwag on, nan on omi wanibaisim aurin on.
14 Ot on Keriso an nuaboai on ebinetewarit, ari tasagob Orot kaitamom on sabu engon tutufin on auris irabob, on an yabin min osi sabu engon on ayuai sirabob.
15 On sabu engon tutufin auris irabob, onai osi sabu iyabon ari yawas bobounai semama on men tous auris wat sinama, baise On osi fasisi irabob ato God rabob emon ibobaimisirai men on mes osi On aurin wat sinama.
16 On an ra ot tanat baitutumotit tamamatar on ot men orot jever usisi nan tanites tanigurubabanis mes. Wera tani min on nanaba orot jever asi itinai on Keriso mat taigurubabanai, baise ari on men bobo nanaba taniyamai mes.
17 Iyai iyafan inat Kerisoai ebikaita, on orot jever an yawas on boboun imatar, yawas atamanin on inai isawar, ato yawas bobous on inat.
18 Atonio osi bobo engon tutufin on God efofour, On Kerisoai on ot ragit tamatar tamama on ikitabiret tanat On tuturan mes tamatar a mat On atonio bobo itet sabu fani tanboes sinnat On tuturan mes sinmatar.
19 Wei ai dura an yabin min ato nanaba; Kerisoai on God sabu engon tutufin ebiyames senat On tuturan mes semamatar. God on sabu asi bokomas sifofour on engon inotbur, a On dura itet ekakasonet On mamaba sabu iyawasis sinat tuturan mes simatar aurin on.
20 Wei on atonio siyafarei wagat Keriso aurin wabikakafun, wei ai dura wabikakafun on onai on sitau God Toun on sabu auris eyoyor bait. Wei Keriso wein on omi aurim wabifefeyan: Omi ragit womatar womama on woniyamai God Toun inikitabirem On tuturan mes wonmatar!
21 Keriso on an bokomas ambin, baise ot fasiti on God iyamai ati bokomas on mat tafasararam onai ot tanat On mat tabikaita on, God an yawas totorin on mat tatfasararam mes.