1 IONI
Ioni yana kiluma nagami
'Eba kiavemageta
Tutuyanina Ioni i ve'auvea lubulubu de'e kumekumetana i kilumi tovetumaganavo i miamiani 'awalawa Eisia nageneye faifaidi. Tutuyanina 'waineye Ioni i miamia Efeso.
Ioni yana nuanua 'ailuga. Tamu, Iesu 'ana tovetumaganavo i velu'ase'asedi bega Yaubada wata Natuna Iesu Keliso 'aisedi 'waidie i na tovotovoi fa'alina. 'Akonadi Yaubada i nuakalikalieniga wata i lubwainedi ediavo i na nuakalikaliedi. Wata tamu yana nuanua, i matakia 'waidie tove-vekavekali faifaidi. Tovekalinidi igodi i vo, Tomogoda nani sakoina, begaidi kebu 'ana fata Keliso i na vetomotoga ma tomogona 'ida bani'odi. 'Ana 'isa'isa mogitana tomotoga, siwe tomogona kebu tomogoda bani'odi.” Wata tovekalinidi yadi nuanua 'aseta nani 'atumaiotogina, we'e nuakalikali tamu nani-'avo'avovo wata sauluva tonovidi kebu faifaidi i da nuanua. Tomotoganidi 'asa'aiana taunidi Keliso 'ana gaviavo, begaidi Ioni nuanuana yadi vekalinidi i na sivemagesedi ve tonovidi 'waidiega. Lubulubunina 'ana 'idi side bani'odi.
Lubulubu nagena 'ana nuanua mogitana. 1:1-4
Sauluva magemagetadi wata sauluva dudubala kebu taiadi i da vesala. 1:5-2:17
I matakia Keliso 'ana gaviavo faifaidi. 2:18-29
'Ada fata ta na 'asetai egavo Yaubada natunavo wata Seitani natunavo. 3:1-4:6
Yaubada nuakalikali lamuna bega natunavo i lubwainedi i na vevenuakalikali. 4:7-5:5
Iesu Keliso 'ana tolu'ivonavo 'aitonu, wata mia-vagata faifaidi. 5:6-21
1
Keliso yada mia 'ivauna wata 'atumaina lamuna
1 Basenadiotoga Yaubada fwayafwaya wata abama bola kebu i da 'idewadiga, nagamidiotoga yana Tosivemageta i miamia, mulieta 'a 'iseni wata yana vona 'a nogai. Mogitana 'a 'isaotogi wata taunima 'a 'abitonovi. Taunina Yaubada yana nuanua matatabuna 'ana Tosivemageta wata 'wainega mia 'ivauna wata 'atumaina ta veveluagai.
2 Tutuyanina mianina lamuna i souyeni, 'ima 'a 'iseni begaidi 'a kiluma 'a lulu'ivona 'waimie. Tosivemagetanina 'a vonevoneyeniga, taunina Keliso, basenadiotoga Tamada taiadi i miamia, siwe i mai bega 'wainega mia 'atumaina wata miamia-vagaina ta na veluagai.
3 Ava'ai 'a 'iseni wata 'a nogai 'a lulu'ivona 'waimie bega yama veiana Tamada wata Natuna Iesu Keliso taiadi 'omi wata bani'odi 'wa na veiana nika yada sosoana 'aitamogana.
4 'A kilukiluma 'waimie bega taiadi ta na sososoana mogitana.
Yaubada magemagetana
5 Ava'ai basenadi 'a nogai Iesu 'wainega, 'a lulu'ivona 'waimie, vonanina side bani'odi. Yaubada magemagetana, kebu tamu sai'afo dudubala i da 'eno'eno 'waineye.
6 Begaidi 'ai'edi ta na vo 'ako 'ida Yaubada taiadi ta veiana, siwe yada nuanua dudubalidi, yada veifufunina vekali wata Yaubada 'ana 'aseta mogitana kebu ta da vematayakeyakedi.
7 Yaubada yana 'eba mia magemagetaotogina bega 'ai'edi ta na miamiaga yana magetanina nageneye, ma yada sosoana ta na veveiaiana wata Natuna Iesu dayagina i 'i'ivevunavunagida yada sakona 'aitamogana 'aitamogana 'waidiega.
8 'Ai'edi ta na vo, 'Ima kebu tosakonaga,” taunida ta vevekalieda wata Yaubada 'ana 'aseta mogitana kebu i da 'eno'eno yada nuanua 'waidie.
9 We'e 'ai'edi yada sakona ta na lu'ivoneyedi Yaubada 'waineye, ta vetumagana mogitana yada sakona i na nuatavunidi. Wata i na 'ivevunavunagida yada sauluva sakoidi 'waidiega, fai taunina ma 'ana vetumagana wata yana sauluva tonovina.
10 'Ai'edi ta na vo, 'Ima kebu 'a da sakonaga,”'ana 'aseta Yaubada kumanina 'wa da vo tovekali wata yana vona kebu i da 'eno'eno yada nuanua 'waidie.