137
1 Raʼ yegu nacuáʼ lu yu Babilonia gurö́ʼötuʼ,
en gurödxi yéchiʼtuʼ, cateʼ yöjnetuʼ yödzö Sión.
2 Lu yaga rö́ʼgaca yuguʼ raʼ yegu niʼ
bugálaʼtuʼ yuguʼ le rúl-lalentuʼ.
3 Caní bentuʼ tuʼ gulaʼnabi yudxi nupa gulachë́ʼ netuʼ nadzuntuʼ niʼ gúl-latuʼ.
Nupa buluʼsacaʼ ziʼ netuʼ gulaʼnaba queë́tuʼ yöl-laʼ ruzxidxi, gulaʼnná:
“Guliʼgul-la queë́tuʼ tu le rul-la que yödzö Sión.”
4 ¿Nacxi caz gaca gúl-latuʼ le rul-la queëʼ Xanruʼ
ga ni nadzuntuʼ tu lu yödzö izáʼa?
5 Channö gal-la ládxaʼa yödzö Jerusalén,
rinábidaʼ-nëʼ Dios ugǘëʼ yöl-laʼ raca que naʼa ibëla.
6 Rinábidaʼ-nëʼ gunëʼ ga taʼ lúdxaʼa chichjaʼ
channö cabí tsöjnedaʼ ladzaʼ,
en channö cabí huíʼ zxönraʼ yödzö Jerusalén ca iaʼtú le ruzíʼidaʼ xibé.
7 Yöjné le gulunëʼ zxíʼini xiʼsóëʼ Edom, Xan,
le gulunëʼ dza busiúdxuʼ yödzö Jerusalén,
ca naʼ gulaʼnnë́ʼ: “Guliʼquínnaj dëra.
Guliʼquinnaj dëra ga idxintë xilibi zöʼö yödzö naʼ.”
8 Libíʼiliʼ, bönachi Babilonia, libíʼiliʼ rusunítiliʼ,
bicaʼ ba nu ubíʼi queë́liʼ ca naʼ benliʼ queë́tuʼ.
9 Bicaʼ ba nu quelaʼ yuguʼ bíʼidoʼ queë́liʼ
en uzxuzxaj légacabiʼ yuguʼ lu guiö́j.