51
1 Dios quiaʼ, buzáʼ ladxiʼ quiaʼ tsca naca yöl-laʼ dxiʼi ladxiʼ zxön quiuʼ,
en tsca naca le zián le ruzáʼ ládxuʼu quiaʼ, bugúa yuguʼ le gudáʼbagaʼa loʼ Liʼ.
2 Buguíbiticaʼsö nedaʼ tsca naca döʼ biʼa.
Buchiʼa nedaʼ lu dul-laʼ nunaʼ.
3 Nöz quézidaʼ le gudáʼbagaʼa,
en röjnétiquiʼsidaʼ yuguʼ dul-laʼ nunaʼ.
4 Loʼ Liʼ cazuʼ benaʼ dul-laʼ,
en loʼ Liʼ caʼ biʼa döʼ.
Naca bëʼ nacuʼ tsahuiʼ cateʼ ruʼu didzaʼ,
en idú dxiʼa, en tsahuiʼ nacuʼ cateʼ ruchiʼa rusörö́uʼ queë́tuʼ.
5 Buyútsöcaʼ, nabágaʼa döʼ cateʼ gusí lotë guljaʼ,
en lu dul-laʼ zoa cazaʼ cateʼ buzóanu xináʼa nedaʼ.
6 Rë́ʼënuʼ soa le naca idútë li icja ládxiʼdoʼotuʼ.
Guchiza icja ládxiʼdaʼahuaʼ yöl-laʼ réajniʼi.
7 Buchiʼa nedaʼ len le ruchíʼaninuʼ, ateʼ gacaʼ dxiʼa.
Buguibi nedaʼ, ateʼ huöácaʼ zxílaʼdoʼos.
8 Ben ga yöndaʼ le nachë́ʼ yöl-laʼ ruzíʼ xibé, en yöl-laʼ rudzeja,
para huöáca ládxaʼa lu le raca quiaʼ tuʼ benuʼ ga réquibeʼedaʼ nabágaʼa dul-laʼ.
9 Bitiʼ uyúʼ yuguʼ dul-laʼ nunaʼ,
en busulu yúguʼtë le naca döʼ nabágaʼa.
10 Dios quiaʼ, bun dxiʼa ládxiʼdaʼahuaʼ,
en guchiza nedaʼ tu böʼ cubi le nuzúʼ tsutsu.
11 Bitiʼ ucuítuʼ nedaʼ ga zoaʼ loʼ Liʼ,
en bitiʼ ugúʼ Dios Böʼ Láʼayi quiuʼ Nu zóalen nedaʼ.
12 Bunna quiaʼ yöl-laʼ rudzeja que yöl-laʼ rusölá quiuʼ,
en ben ga gunaʼ ca rnna xtídzuʼu idú ládxaʼa.
13 Níʼirö usë́didaʼ nupa taʼguitsaj xibá quiuʼ ca nácagaca le rë́ʼënuʼ ilúngaca,
ateʼ yuguʼ bönniʼ dul-laʼ uluʼhuécja quiuʼ.
14 Dios quiaʼ, benna nedaʼ lataj cabí ibágaʼa xiguiaʼ.
Naca cazuʼ Dios, Nu rusölá nedaʼ.
Lu yöl-laʼ rudzeja quiaʼ gul-laʼ ca naca cazuʼ tsahuiʼ.
15 Xanaʼ Dios, gusalaj ruáʼa,
ateʼ usiyöndaʼ bönachi yöl-laʼ ba quiuʼ.
16 Laʼtuʼ raza ládxuʼu-baʼ böaʼ-bëdxi gútituʼ-baʼ loʼ, laʼ gúnteaʼ caní.
Bitiʼ raza ládxuʼu-baʼ nu böaʼ uzéguiʼtuʼ-baʼ loʼ.
17 Le rë́ʼënëʼ Dios le naca ca tu le cúʼuruʼ lahuëʼ
naca böʼ naca cáziruʼ le nötaj nagula ladxiʼ.
Dios quiaʼ, bitiʼ ucáʼanuʼ cáʼasö ládxiʼdoʼotuʼ
le ruhuíʼini ladxiʼ, en le naca nöxaj ladxiʼ.
18 Lu yöl-laʼ ruzáʼ ladxiʼ quiuʼ ben le naca dxiʼa
quégaca bönachi yödzö Sión.
Buchisa zöʼö le run chiʼi yödzö Jerusalén.
19 Níʼirö tsaza ládxuʼu yuguʼ le cúʼutuʼ loʼ le naca idú dxiʼa,
yuguʼ böaʼ guíxiʼdoʼ gútituʼ-baʼ loʼ,
en yuguʼ böaʼ-bë́dxidoʼ uzéguiʼtuʼ-baʼ loʼ.
Níʼirö ilútiëʼ-baʼ yuguʼ bëdxi biguiúʼdoʼ,
en ilaʼguʼë-baʼ lu bucugu quiuʼ.